Семејствата од хрватско потекло во Австралија ги претвораат своите гаражи во мали месарници овие денови, правејќи домашни колбаси, сланина и чварки на начинот на кој нивните предци правеле со векови во Хрватска, објави локалниот весник „Хрватски вјесник“, пренесува „Хина“.
Во Австралија е зима во моментов, па благодарение на ниските температури и поволната влажност, хрватската дијаспора се вклучува во една од своите омилени традиции. За многумина, не станува збор само за зачувување на храната, туку и за зачувување на националниот идентитет.
„Моите внуци не зборуваат хрватски, но ја знаат разликата помеѓу добар и лош колбас“, рече жителката на Мелбурн со смеа. „Тоа е нашата врска со нашата татковина, преку нашите стомаци до нашите срца“, додаде таа.
Мирисот на пиперка и лук го означува доаѓањето на зимата и почетокот на собирањето на Хрватите и нивните потомци, кои ги има околу 250.000. Подготовката започнува неколку недели однапред со набавка на месо, а меѓу зачините е и пиперката од Хрватска.
„Целото семејство е вклучено“, рече еден локален Хрват во чија гаража се суши месото. „Од најмладите до најстарите, секој има своја улога“, додаде тој. Така помладите генерации учат за своите корени. Децата родени во Австралија ги учат вкусовите и мирисите на својата татковина преку овие зимски подготовки.
Во денешно време, кога колбасите се сметаат за деликатес и покрај предупредувањата за нивната висока содржина на масти и сол, австралиските Хрвати ја продолжуваат традицијата не само поради вкусот, туку и поради она што го претставува, врска помеѓу минатото и сегашноста, татковината и новиот дом, семејство и заедница, како што велат.
Во Хрватскиот дом на Босна во Сиднеј за 9 август е најавен посебен настан наречен „Златен колбас“, кога ќе се избере најдобриот колбас направен според семеен рецепт.
