Арсовска брзо реагираше на денешната изјава на премиерот: Еве сега и јас им се извинувам на граѓаните што сум мислела дека си чесен, професор и интелектуалец, не знаејќи што навистина си

Градоначалничката Данела Арсовска, реагира на изјавата на премиерот Христијан Мицкоски за одговорноста за хаосот со ѓубрето во градот преку објава на „Фејсбук“. И таа им се извини на граѓаните.

Во објавата, Арсовска наведува дека советничката група на Мицкоски на општинско ниво не ја поддржала реализацијата на повеќе клучни проекти за јавниот интерес, меѓу кои, како што наведува, набавката на нови автобуси, воведувањето на бесплатен превоз, набавка на механизација за чистење и кадровско зајакнување во противпожарните служби.

„Мицкоски, несреќо, јас завршувам со борбата во која твојот претседател на Советот на Град Скопје и твоите советници 4 години го блокираа и урнисаа градот: не гласаа за нови автобуси, не гласаа за бесплатен превоз, не дозволија да се набави нова механизација за да се чисти ѓубрето, не гласаа ништо во интерес на граѓаните за да биде задоволена твојата суета, пишува Арсовска на ФБ.

Таа вели дека ја прифатила одговорноста за некои очекувања на граѓаните, но и јавно го повикала Мицкоски да прифати одговорност за, како што наведува, последиците од блокадите кои, според неа, довеле до „хаос во Скопје“. „Ако сакаше да има одговорност, требаше ТВОИТЕ СОВЕТНИЦИ да дадат оставка, за да сега ТИ ЗАЕДНО СО НИВ не си директно одговорен за хаосот во Скопје. Еве сега и јас им се извинувам на граѓаните што сум мислела дека си чесен, професор и интелектуалец, не знаејќи што навистина си. ,“ пишува таа во објавата.

Во обвинувањата Арсовска ги набројува и неколкуте големи безбедносни и еколошки проблеми кои, според неа, ги трпи јавноста: жртви меѓу децата во Кочани, пожари поради, како што тврди, „простор за фотоволтаици“, палење отпад и еко-катастрофа во Трубарево, зголемено насилство и серија убиства, вклучувајќи и случаи на жени кои, како што наведува, „ве молеле за помош“.

Арсовска исто така во објавата го повика Мицкоски на самоодговорност упатувајќи критики, наведувајќи дека неговата администрација и политиките имаат удел во состојбата со нелегалните градби и инфраструктурните ризици: „А одговорност за над 150 небезбедни нелегални дивоградби висококатници кои секој момент може да се срушат во Чаир ќе има ли?“ се вели во дел од пораката.

Градоначалничката најавува итни мерки за справување со натрупаниот отпад и вети дека „отпадот ќе се исчисти за една недела“, но нагласува дека тоа нема да ѝ ја исчисти совеста на политичката опозиција за наводните пропусти кои, според неа, го загрозиле здравјето и животите на граѓаните.

Објавата завршува со директна порака до Мицкоски: „Оди скриј се и молчи!“, како и саркастичен коментар за можна нова пропагандна акција од неговиот штаб.

Оваа реакција на Арсовска доаѓа во контекст на продлабочена политичка полемика меѓу градската администрација и опозицијата околу приоритетите и реализацијата на проекти во Скопје.