Армијата на Мјанмар бомбардираше учесници на Фестивалот на светлината, најмалку 40 мртви

Армијата на Мјанмар бомбардираше толпа собрана за Будистичкиот фестивал на светлината и демонстрациите против воената хунта во понеделник, при што загинаа повеќе од 40 лица, вклучувајќи деца, соопштија денес организаторите и сведоците, пренесе „АФП“, објави „Бета“.

Од своја страна, невладината организација за човекови права „Амнести Интернешнл“ соопшти, повикувајќи се на сведоци, дека во нападот загинале 17 до 20 лица.

Илјадници луѓе се собраа во централниот дел на Мјанмар во понеделник вечерта за фестивалот, кој го означува крајот на будистичкиот пост.

Армијата ги бомбардираше демонстрантите, користејќи параглајдер на мотор за да го изврши нападот, изјави за „АФП“ неименуван член на организацискиот комитет на фестивалот.

Според него, толпата се собрала за да прослави, а воедно и да протестира против владејачката хунта кога започнале бомбардирањата околу 19 часот, при што загинале повеќе од 40 лица, а 80 биле повредени.

„Организацискиот одбор ги предупредил луѓето, а една третина од толпата успеала да избега. Сепак, еден параглајдер прелетал над толпата и фрлил две бомби во центарот на собирот“, додаде членот, додавајќи дека денес биле погребани некои жртви и дека останките од некои жртви сè уште се собираат.

Очевидец го потврдил бројот од 40 жртви. Според него, луѓето се обиделе да избегаат кога сфатиле дека параглајдер лета над нив.

Тој рекол дека денес присуствувал на погребите на девет негови пријатели.

Локалните медиуми, исто така, објавија дека околу 40 лица биле убиени.