Архиепископот г. г. Стефан: По признавањето од ПЦА се надеваме дека такви одлуки ќе донесат и други сестрински цркви

Признавањето на автокефалноста на МПЦ-ОА од страна на Православната црква на Америка е доказ на братската љубов, изјави архиепископот охридски и македонски г. г. Стефан. Во интервјуто за весникот „Македонија“ од Торонто, Канада тој одговори на прашањето врзано за претстојната заедничка литургија со поглаварот на Православната црква во Америка, митрополитот Тихон, предвидена за 2 септември во Вашингтон, САД.

– Уште псалмопејачот Давид воскликнува: „Колку е убаво, колку е мило кога браќата живеат заедно“. Ова одлука на Светиот синод на Православната црква на Америка е уште еден доказ за убавината на братската љубов и на заедничарењето помеѓу Црквите. И јас лично, и браќата архијереи и сета полнота на нашата помесна Црква, можеме само да се радуваме за оваа одлука и да се надеваме и да очекуваме дека и оние сестрински цркви кои сè уште немаат донесено истоветна одлука, кога ќе се исполни времето – ќе ја донесат – рече поглаварот на МПЦ-ОА.

Архиепископот г. г. Стефан деновиве се наоѓа во канонска посета на Американско-канадската епархија со која началствува владиката Методиј. Посетата се остварува по повод чествувањата на 60-годишнините од осветувањето на храмовите на две од нашите најстари општини во дијаспората и тоа: „Успение на Пресвета Богородица“ во Колумбос, Охајо, САД и „Св. Климент Охридски“ во Торонто, Онтарио, Канада.

Во интервјуто тој им порачува на нашите сонародници што почесто да ја посетуваат Македонија.

– На нашиот верен народ во САД и Канада им порачувам да ги посетува храмовите на секоја литургија, редовно да се причестува со Светите Христови Тајни и да го помага работењето на нашите црковни општини. И, на крајот, на сите наши луѓе би им порачал почесто да ја посетуваат Македонија за да им овозможат на своите деца и внуци да ја запознаат земјата на своите предци, та и во нив да се возроди љубов кон нашата можеби материјално сиромашна., но со култура и историја богата држава, кон нашиот прекрасен јазик и кон сè што е наше – македонско – порача архиепископот г. г. Стефан.