Низ Саудиска Арабија, Кувајт и Јордан се воведени протоколи за итни случаи откако застрашувачката песочна бура зафати и „проголта“ цел град.
„Ѕид од прашина“ ја зафати провинцијата Ал Касим во централна Саудиска Арабија, блокирајќи ја сончевата светлина и се издигна над жителите, пишува Дејли мејл.
Снимките споделени на социјалните мрежи покажаа како небото станува светло портокалово додека песочната бура го зафаќа градот, намалувајќи ја видливоста речиси целосно.
Локалните жители тврдат дека бурата дошла „без никакво предупредување“ и ја опишуваат како нешто од „апокалиптичен филм“.
„Во Ал Касим беше толку темно што изгледаше како некој да ги исклучил светлата“, напиша еден од сведоците на социјалните мрежи, додавајќи дека дрвјата исто така „паѓаат како домино“.
Друг корисник денеска изјави дека патиштата сѐ уште се празни, а жителите се затворени во своите домови поради невремето, кое остави „трага на хаос“ и „не покажува знаци на смирување“.
Во сила црвените предупредувања
Саудиска Арабија, како и соседните Кувајт и Јордан, во моментов се под црвени предупредувања за силни ветрови и обилни врнежи од дожд кои носат ризик од бури, поројни поплави, град и други потенцијално опасни временски настани во наредните денови.
Националниот метеоролошки центар на Саудиска Арабија ја повика јавноста да биде претпазлива, да го ограничи патувањето и да избегнува отворени простори за време на бурите – кои се очекува да траат до средината на неделата.
Песочната бура сериозно го прекина сообраќајот – два лета од Египет до Кувајт во неделата мораа да бидат пренасочени кон Дамам во Саудиска Арабија, според Gulf News.
Пристанишните власти на Кувајт ги затворија пристаништата Шувајк и Шуаиба за да ги заштитат работниците и инфраструктурата. Операциите, наводно, продолжиле во понеделник наутро.
Евакуирани туристите
Повеќе од илјада туристи беа евакуирани од Петра, познатото археолошко наоѓалиште во југозападната јорданска пустина, во неделата, откако поплавите ја поплавија областа.
Во моментот кога беа активирани протоколите за итни случаи, имаше повеќе од 1.700 посетители на локацијата, се вели во извештајот.
Клучните знаменитости, како Ал Казна, храмот на Сиките и Манастирот, исто така беа евакуирани поради зголеменото ниво на водата.
Најмалку две лица загинаа во поплавите, меѓу кои и една Белгијка и нејзиниот син кои биле на авантуристичка турнеја во областа Вади ал Нахил, популарно корито во близина на јорданскиот град Маан.
Две од нејзините деца преживеале, пренесува Gulf News. Спасувачките екипи сѐ уште трагаат по преживеани.
Инциденти на заробени туристи се забележани и во Тафила и Ал Хаса.
