-Бараме најстрога судска осуда, затворски казни и целосна кривична одговорност за сите инволвирани – директните извршители, соучесниците и поранешниот директор. Уште поскандалозно е што лицето под истрага за ова дело денес сè уште е вработено во ЗОО Скопје, и тоа со овластување за контрола и надзор на квалитетот, што е целосно неприфатливо и опасно – потенцираат од „Анима мунди“ во пресрет на почетокот на судскиот процес. Настанот се случи во 2022 година кога според тврдењата од 16 коњи 10 биле болни и затоа било решено тие да бидат заклани. Постапката, тврдеше тогашниот директор, била согласно со законите и правилата за третман на животни, а била известена и АХВ
Утре започнува судскиот процес за закланите коњи и маската во скопската Зоолошка градина, па Здружението за заштита на животните „Анима мунди“, побара да се изречат најстроги затворски казни.
Настанот се случи во јули 2022 година. Тогаш беа заклани 10 коња и беше кажано дека месото од нив ќе се користи за храна на другите животни во Зоолошката. Тогашниот директор на Зоолошката, Кристијан Стаменов, објасни за медиумите дека се работи за животни што ги добиле од Агенцијата за запленет имот, при акции за фаќање дрвокрадци и шверцери. Според неговите тврдења од 16 коњи 10 биле болни и затоа било решено тие да бидат заклани. Постапката, тврдеше, била согласно со законите и правилата за третман на животни, а била известена и Агенцијата за храна и ветеринарство.
Од Здружението и тогаш чинот го нарекоа „еден од најмонструозните и најсрамни настани во поновата историја на односот кон животните во нашата земја“, нагласувајќи дека ваквиот чин претставува невидена суровост, злоупотреба на службената положба и кршење на сите морални и законски норми.
– Бараме најстрога судска осуда, затворски казни и целосна кривична одговорност за сите инволвирани – директните извршители, соучесниците и поранешниот директор, Кристијан Стаменов, кој, како што велат, ја претворил институцијата што треба да ги штити животните во кланица под отворено небо. Станува збор за убиство и за мачење животни без процена, без дозвола и без етички основ, сторено пред очите на јавноста. Уште поскандалозно е што лицето под истрага за ова дело денес сè уште е вработено во ЗОО Скопје, и тоа со овластување за контрола и надзор на квалитетот, што е целосно неприфатливо и опасно – потенцираат од „Анима мунди“.
Оттаму бараат и итно разрешување на сите вклучени, транспарентна постапка отворена за јавноста и највисоки затворски казни според Законот за мачење и убиство на животни.
Притоа, ги повикуваат институциите да постапат со максимална сериозност во овој случај, бидејќи, како што нагласуваат, мачењето и убивањето животни не смее и нема да помине без последици.
– Јавноста е тука и будно го следи секој чекор до конечниот исход. Ние нема да отстапиме, нема да замолчиме и нема да простиме додека не биде исполнета правдата – заклучија од „Анима мунди“.
И во измиаттиот период повеќе здруженија реагираа на несоодветни услови во зоолошката имаше и иницијативи таа да се трансформира во центар за рехабилитација и конзервација на диви автохтони животни, раководен од активисти и од ветеринари.
За активистите на „Зелен хуман град“, еден таков центар не само што ќе биде прибежиште за повредените животни и за тие што останале сирачиња туку и ќе биде вистинско место за едукација за животот на животните, но и место за обучување кадри што би работеле заштита на биодиверзитетот.
– Секојдневно добиваме повици за згрижување диво животно што е повредено или ја загубило мајката. За поголемите животни како што е мечката, иако е заштитена, ако се најдат мали мечиња без мајка или повредена мечка, решението е куршум. Таквата нехуманост, за нас, е недозволива. Македонскиот систем не е подготвен соодветно да реагира во случаите со повредени диви животни или диви животни останати без мајка и токму затоа стапката на смртност кај младите диви животни е многу голема во природата. Во центарот за рехабилитација на автохтони видови животни во Македонија, ќе можеме навистина да им помагаме на животните, а ќе обезбедиме и достоинствени работни места за македонските стручни кадри, кои ќе ги задржиме во Скопје и во Македонија – наведуваат од „Зелен хуман град“.
(А. П.)
