„Ангели во Америка“ во режија на Филип Петковски премиерно во МНТ

„Ангели во Америка”, новата претстава работена според ремек-делото на Тони Кушнер, добитник на Пулицерова, но и многу други награди, а во режија на Филип Петковски, ќе ја има својата премиера на 1 септември, на големата сцена во Македонскиот народен театар со почеток во 20 часот.

Во 1991 година, инспириран од својот приватен живот, Тони Кушнер ја пишува „Ангели во Америка: Среќна фантазија на национални теми”, дело што засекогаш ќе ја промени светската театарска историја, а тој ќе се позиционира како еден од највлијателните американски драмски автори. Текстот ја добива Пулицеровата награда за драма, наградата „Тони“, како и речиси сите други значајни признанија во театарот. Тоа се должи и на способноста на овој драмски текст да го претвори театарот во моќна алатка за општествени коментари преку личните приказни на ликовите, комбинирајќи извонредна драматуршка структура, акцент на актерската игра и симболични сцени што и денес звучат релевантно, се вели во најавата на претставата.

Ликовите ги толкуваат Јордан Симонов, Александар Стоименовски, Стефан Спасов, Илин Јовановски, Наталија Теодосиева, Тања Кочовска, Дамјан Цветановски и Нела Павловска.

– Преку дејството сместено во Њујорк во 1980-тите, во време на конзервативната политика на Роналд Реган и јавната незаинтересираност за епидемијата на СИДА, „Ангели во Америка” ја следи судбината на четири геј ликови и нивните најблиски, чии приказни зборуваат за љубов под незамислив притисок, за страв и храброст, за вера и сомнеж, за човечката потреба да се најде надеж, дури и кога светот е решен да ја уништи. Овие приказни се испреплетуваат и со реални историски личности, како познатиот адвокат Рој Кон, кој јавно ја негирал сопствената хомосексуалност, но, на крајот, умира од СИДА… велат од МНТ.

Инаку, претставата наместо да се фокусира на стереотипни и комични прикази на квир луѓето, таа се фокусира на приказни за љубов под незамислив притисок, за страв и храброст, за вера и сомнеж, за човечката потреба да се најде надеж дури и кога светот изгледа решен да ја уништи. Сидата во оваа претстава не е само болест – таа е и симбол за начинот на кој општеството се однесува кон сите оние што се ранливи, особено во ситуации кога е политички „погодно“ да ја свртиме главата настрана.

Сценографијата во претставата е на Мартин Манев, костимографијата на Антонија Гугинска-Јорданоска, додека продуценти на проектот се Петар Антевски и Филип Петковски.

Претставата е копродукција на Здружението за афирмација на театарската уметност „Пресврт” – Скопје и Македонскиот народен театар, со поддршка на Министерството за култура, Европска куќа – Скопје, Германската амбасада во Скопје и Здружението „Заедно посилни“ и Gilead sciences Europe LTD.

Претставата не се препорачува за лица помлади од 16 години.