Анализа на древна ДНК ги открива најстарите траги на човечка активност на Истокот; Mатрилинеарни општества имало и пред железното време во Eвропа

Во источната провинција Шандонг, научниците открија постоење на праисториско матрилинеарно општество кое датира од периодот меѓу 2750 и 2500 година пр.н.е. Овие откритија, објавени во престижното научно списание Nature, ја менуваат досегашната претпоставка дека матрилинеарни општества се појавиле дури во железното време во Европа. Во исто време, на западот од Кина, археолозите во провинцијата Шанси открија над 100 палеолитски локалитети во градот Веи’нан, што потврдуваат човечка активност стара најмалку 600.000 години

Нови археолошки истражувања во Кина фрлаат светло врз длабоките корени на човечката цивилизација и социјалната организација на Истокот, откривајќи досега непознати аспекти од праисторијата.

Во источната провинција Шандонг, научниците открија постоење на праисториско матрилинеарно општество, кое датира од периодот меѓу 2750 и 2500 година пр.н.е. Овие откритија, објавени во престижното научно списание Nature, ја менуваат досегашната претпоставка дека матрилинеарни општества се појавиле дури во железното време во Европа.

Истражувачкиот тим, преку анализа на древна ДНК, археолошки контекст и изотопски податоци од 60 индивидуи од две гробници во археолошкиот локалитет Фуџија, утврдил дека станува збор за заедница со силна социјална кохезија, организирана според мајчински родови. Присуството на примарни и секундарни погребувања и докази за брачни врски меѓу членовите од гробиштата укажуваат на општество засновано на матрилинеарна структура и земјоделство со просо.

-Со мултидисциплинарен пристап, го потврдивме постоењето на вакво општество, што претставува значаен пробив во проучувањето на социјалната организација во раната човечка историја, изјави професорот Жанг Хаи од Пекиншкиот универзитет.

Во исто време, на западот од Кина, археолозите во провинцијата Шанси открија над 100 палеолитски локалитети во градот Веи’нан, што потврдуваат човечка активност стара најмалку 600.000 години. Истражувањата се дел од Четвртата национална пописна програма за културно наследство.

Оваа област веќе е позната по откривањето на фосилите „Лантиан човек“ и „Дали човек“ во 60-тите и 70-тите години на 20 век. Новите наоди ја продлабочуваат научната свест за еволуцијата и културниот развој на човештвото во регионот на источната Гуанчонг Рамнина.

-Овие откритија не само што го продолжуваат времепловот на човечкото присуство тука, туку и ни даваат нови траги за културното наследство на реката Жолта, истакна Зу Лијанг, управник на Музејот во Веи’нан.

Кина го слави културното и природното наследство

Кина ќе го прослави Денот на културното и природното наследство во сабота, 14 јуни, а главниот настан ќе се одржи во Чангша, во централната кинеска провинција Хунан, соопшти Националната управа за културно наследство.

Установен во 2006 година, овој годишен настан се одржува секоја втора сабота во јуни. Темата за оваа година, која се преведува како „оживување на културното наследство за да се покаже нов сјај“, ги истакнува напорите за зачувување и обновување на културните реликвии на нацијата.

Прославите во Чангша ќе вклучуваат свечено отворање, тематски форуми, форум за технолошки иновации во културното наследство и изложба за реката Јангце и кинеската цивилизација.

На национално ниво, властите и институциите за културно наследство ќе организираат над 7.000 активности, како онлајн така и со физичко присуство, во рамките на Денот на културното и природното наследство.