Амбасадорот на САД во НАТО: Америка внимателно ја следи ситуацијата во Србија и Република Српска

Амбасадорот на САД во НАТО, Метју Витакер, изјави дека САД внимателно ја следат ситуацијата во Србија и Република Српска, ентитет на Босна и Херцеговина, со цел да се спречат случувања што би можеле да доведат до регионален конфликт, објави денес „Слободна Европа“, пренесува „Бета“.

„Многу внимателно следиме сè што се случува и во Република Српска и во Србија. Моментално сме фокусирани на тоа да се осигураме дека ситуацијата нема да ескалира во потенцијален регионален конфликт“, рече Витакер на еден од панелите на Стратешкиот форум во Блед.

Тој нагласи дека САД „сакаат стабилност на Западен Балкан“ и дека тоа, како што рече, е важно и за европските партнери во рамките на НАТО, кои „имаат обврска да дејствуваат заедно во кризни ситуации“.

Србија со месеци ја потресуваат антивладини протести, за време на кои повремено избувнуваше насилство, додека претседателот Александар Вучиќ ги обвинуваше странските фактори дека се обидуваат да поттикнат револуција, без никакви докази или споменување кој поттикнува насилна промена на власта, пишува „РСЕ/РЛ“.

Во Република Српска, поранешниот претседател Милорад Додик ја оспорува пресудата на босанскиот суд со која му беше одземен претседателскиот мандат по неговата пресуда и постојано се закануваше дека ќе го одвои ентитетот од остатокот од Босна.

На прашањето дали НАТО ќе интервенира доколку политичката криза ескалира во вооружен конфликт, особено во Босна, но и во Србија, Витакер рече дека НАТО дејствува со еден глас, но додаде: „Далеку сме од тоа“.

„Ако НАТО ќе се вклучи… Правило број еден во политиката е да не се реагира на претпоставки. Мислам дека мора да видиме како ќе се одвиваат работите“, рече Витакер.

„Ќе продолжиме да ги охрабруваме сите страни да работат во согласност со Дејтонскиот договор“, рече тој, осврнувајќи се на договорите со кои заврши војната во Босна и Херцеговина во 1990-тите години од 20-тиот век.

Амбасадорот на САД, исто така, рече дека „НАТО е посилен од кога било“ и дека „тоа треба да биде многу загрижувачко за нашите противници“.

На прашањето дали американскиот претседател Доналд Трамп би можел да се сретне со Вучиќ или Додик, Витакер рече дека нема индикации за такви средби, но дека за нив би можело да се разговара доколку има јасни придобивки за мирот и стабилноста.

Тој рече дека Трамп има посебна способност да комуницира со светските лидери, да го користи влијанието на претседателството на САД и моќта на државата, во корист на мирот, демократијата, стабилноста и економскиот развој.

Тој нагласи дека доколку Трамп одлучи да се сретне со Вучиќ или Додик, тоа нема да биде за да ја зајакне нивната политичка позиција, туку само ако тоа служи за унапредување на пошироките интереси на мирот и стабилноста.

„Секако не би прифатил средба што има за цел да ја зајакне политичката позиција на кој било лидер. Тоа не е она што го прави претседателот Трамп“, рече американскиот амбасадор во НАТО.

Тој го опиша Трамп како „миротворец“, нагласувајќи дека неговата политика се фокусира на резултати и создавање можности за напредок.