„Алигатор Алкатраз“: Флорида гради центар за мигранти опкружен со алигатори и питони

Флорида започна со изградба на центар за притвор на мигранти, наречен „Алигатор Алкатраз“, во средината на Еверглејдс, кој е претежно тревнато мочуриште полно со алигатори.

Секретарката на Министерството за внатрешна безбедност, Кристи Ноем, изјави дека објектот ќе биде финансиран „во голем дел“ од Програмата за засолниште и услуги на Федералната агенција за управување со вонредни состојби, која претходно се користеше за обезбедување сместување и друга помош на нелегалните имигранти.

Планот беше критикуван од неколку пратеници, вклучувајќи го и градоначалникот на округот Мајами-Дејд, кој тврдеше дека може да биде „разорен за животната средина“. Предлогот е дел од обидот да се исполнат предизборните ветувања на Доналд Трамп за зголемена депортација на нелегални мигранти.

Alligator Alcatraz: the one-stop shop to carry out President Trump’s mass deportation agenda. pic.twitter.com/96um2IXE7U

— Attorney General James Uthmeier (@AGJamesUthmeier) June 19, 2025

„Под водство на претседателот Трамп, работиме со турбо брзина на економични и иновативни начини за спроведување на мандатот на американскиот народ за масовна депортација на криминални нелегални имигранти“, наведе Ноем во соопштението.

Објектот ќе биде изграден на местото на аеродромот за обука Дејд-Колиер, јавен аеродром кој се наоѓа на околу 58 километри од Мајами, а неговото одржување ќе чини околу 450 милиони долари годишно.

Во видео објавено на X, државниот обвинител на Флорида, Џејмс Утмаер, го нарече аеродромот „практично напуштен објект“. Тој рече дека притворскиот центар може да се изгради за 30 до 60 дена и дека може да прими околу 1.000 луѓе.

Според него, изборот на локација изгледа како природен фактор за одвраќање на потенцијалните бегалци.

„Ако излезат, не ги чека многу освен алигатори и питони. Немаат каде да одат, нема каде да се кријат“, рече Утмаер во видеото.

Градоначалничката на округот Мајами-Дејд, Данијела Левин Кава, демократка, го критикуваше планот, велејќи дека „влијанијата врз екосистемот Еверглејдс би можеле да бидат катастрофални“.

Еверглејдс е уникатен еколошки регион кој вклучува мочуришта, прерии, шуми, мангрови и естуари. Утмајер рече дека објектот нема да биде сместен во Националниот парк Еверглејдс.