Алармантна криза со менталното здравје во секторот: Една третина од лекарите и медицинските сестри во Европа страдаат од депресија

Здравствените работници низ цела Европа се соочуваат со сериозна криза со менталното здравје, при што еден од тројца лекари и медицински сестри страдаат од депресија, додека еден од десет размислувал за самоубиство, покажува ново истражување на Светската здравствена организација (СЗО).

Еден од тројца лекари и медицински сестри во Европа страдаат од депресија, а еден од десет има пасивни самоубиствени мисли, покажува ново истражување на Светската здравствена организација.

Условите за работа дополнително го влошуваат нивното ментално здравје, а во некои случаи депресијата е многу сериозна. Пасивни самоубиствени мисли, кои го зголемуваат ризикот од обиди за самоубиство, пријавиле 10 проценти од испитаниците во изминатата година.

„Ова е неприфатлив товар за оние кои се грижат за нас. Не мора да биде вака“, рече д-р Ханс-Хенри Клуге, директор на СЗО за Европа.

Истражувањето, кое опфати повеќе од 90.000 лекари и медицински сестри од Европската Унија, Исланд и Норвешка, покажува алармантни податоци.

Еден од тројца здравствени работници изјавиле дека биле изложени на малтретирање или закани за насилство на работа во изминатата година, додека 10% пријавиле физичко насилство или сексуално вознемирување.

Во исто време, дури една четвртина од лекарите работат повеќе од 50 часа неделно, а голем број вработени, 32% од лекарите и 25% од медицинските сестри, имаат договори за привремено вработување, што дополнително го поттикнува чувството на несигурност.

Работниците кои се изложени на насилство, долги смени и исцрпувачки работен ритам имаат значително поголема веројатност да страдаат од депресија, анксиозност или да имаат самоубиствени мисли.

Последици за пациентите и здравствениот систем

Проблемите со менталното здравје кај здравствените работници, исто така, директно влијаат на квалитетот на здравствената заштита. Помеѓу 11% и 34% од анкетираните размислуваат да ги напуштат своите работни места, што е особено загрижувачко со оглед на растечкиот недостиг на медицински персонал, додека проценките сугерираат дека до 2030 година во Европа ќе недостасуваат дури 940.000 здравствени работници.

Кога персоналот зема слободно време од работа или боледување од причини поврзани со менталното здравје, здравствените системи се изложени на дополнителен притисок. Пациентите потоа чекаат подолго и добиваат послаба грижа.

„Физички и ментално сме исцрпени, што за жал понекогаш води до медицински грешки“, рече Мелани Дебаре, специјализант по радиологија во Франција.

Таа, исто така, наведе загрижувачки податоци од Франција: дури 66% од студентите по медицина доживеале епизода на депресија, а 21% имале самоубиствени мисли во изминатата година, три пати повеќе отколку кај општата популација.

СЗО: Потребни се итни промени

СЗО ги повикува здравствените системи да преземат итни мерки за подобрување на благосостојбата на своите работници. Меѓу препораките се: строга политика на нулта толеранција кон насилството на работното место, преглед на работата во смени и прекувремената работа за да се запре културата на работа до исцрпеност, и обезбедување достапна психолошка поддршка.

„Кризата со менталното здравје кај здравствените работници е всушност криза на здравствената безбедност. Таа ја загрозува стабилноста на целиот здравствен систем. Не смееме да ги изгубиме поради прегорување, очај или насилство“, предупреди Клуге.

Извор: United nations News