Главната борба на вечерта на настанот „УФЦ 321“ во Абу Даби помеѓу Том Аспинал и Сирил Гејн заврши катастрофално и беше особено тешка за британскиот шампион. Борбата за титулата во тешка категорија беше прекината во првата рунда откако Аспинал доби убод со прст во окото, што доведе до контроверзни реакции.

По неколку минути во кои му беше дадена лекарска помош, Аспинал им призна на судијата и на лекарот дека не може да гледа со едното око, поради што мечот беше прогласен за неважечки и се чека реванш во кој тој ќе го брани шампионскиот појас.

  • Треба да престанеш да се бориш додека не се почувствуваш повторно добро и не добиеш наше одобрение. Откако ќе се увериме дека сè се вратило во нормала со видот, тогаш ќе се вратиш во кафезот. Но, не најдовме ништо опасно – му порача докторот на Аспинал.

Фрустрацијата на Аспинал беше очигледна и тој сакаше што поскоро да го напушти кафезот за да добие медицинска помош. И покрај ова, коментаторот на УФЦ, Даниел Кормие, инсистираше на интервју во октагонот, во текот на кое публиката во Абу Даби почна да го исвиркува.

Ситуацијата дополнително се влоши на прес-конференцијата, каде што шефот на УФЦ, Дана Вајт, изјави дека Аспинал не сакал да се бори, сугерирајќи дека се откажал. Иако Аспинал бил однесен во болница, легендата на УФЦ и член на Куќата на славните, Чаел Сонен (48), му рекол дека требало да ја продолжи борбата и покрај повредата.

  • Ударот во окото е нелегален, но борбата со едно око е многу честа. Искрено, ако си светски шампион во тешка категорија, понекогаш мора да се бориш со едно око. Ако те боцнат во окото и си повреден, тоа е сосема друга приказна, но ако те боцнат во окото и не можеш да гледаш, во нашиот спорт тоа е нешто што мора да го поминеш – изјави Сонен за ЕСПН.

Со оглед на тоа што борбата немаше победник, Дана Вајт објави дека ќе се обиде да закаже реванш што е можно поскоро, споменувајќи ги декември и јануари како потенцијални датуми.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ