Многу луѓе чуваат стара технологија во своите плакари или тавани, уреди што не ги фрлиле со години од некоја причина. Сето ова може да биде богатство бидејќи страствените купувачи бараат необични предмети на онлајн пазарите.
За потсетување, компјутер Apple-1 беше продаден на аукција на почетокот на годината за исклучително висока цена – за дури 375.000 долари.
Според британскиот сајт за онлајн продажба Gumtree, продажбата на стари мобилни телефони, играчки конзоли и друга технологија од 1990-тите и 2000-тите може да заработи стотици, па дури и илјадници евра.
Меѓу најбараните модели на мобилни телефони се старите уреди BlackBerry, Nokia и Motorola, како и првата генерација на iPhone на Apple, објавува Poslovni.hr.
Иако овие телефони немаат речиси никаква практична вредност во споредба со денешните паметни уреди, сепак има колекционери кои се подготвени да платат висока цена за да ги добијат.
Во повеќето случаи, купувачите на овие предмети немаат намера да ги користат за нивната оригинална намена.
Бен Вуд, основач и куратор на Музејот на мобилни телефони, објаснува дека причината ретко е практична. „Луѓето ретко купуваат стари телефони за да ги користат – во многу случаи тие и онака не би работеле. Постарите мобилни мрежи од прва, втора и трета генерација се затворени или постепено се укинуваат“, вели Вуд. „Сумњам дека во повеќето случаи тоа е комбинација од носталгија и надежи на колекционерите дека вредноста на телефоните ќе се зголемува како што стареат и стануваат поретки“.
„Дејли меил“ објавува дека Вуд советува дека најлесниот начин да се провери вредноста на стар мобилен телефон е да се пребарува на eBay.
„Постои пазар за стари мобилни телефони и можете брзо да најдете ценовен опсег за речиси секој модел“, вели тој. „Иако веројатно ќе бидете разочарани во повеќето случаи, во последниве години има забележително зголемување на цените на онлајн аукциите, бидејќи луѓето станаа позаинтересирани за собирање стара технологија“.
Постојат модели чии цени можат да достигнат и илјадници фунти – вклучувајќи го Vertu Signature и оригиналниот Apple iPhone од 2007 година, кои се продадоа за дури 10.000 фунти (околу 11.490 евра). BlackBerry телефоните, кои не се произведуваат речиси една деценија, сè уште се барани на платформите за препродажба.
Додека просечниот „класичен“ модел се продава за околу 30 фунти, ограничените изданија како BlackBerry Porsche Design од 2011 година се сметаат за колекционерски предмети и можат да достигнат цена од 250 фунти (околу 290 евра) до 1.500 фунти (околу 1.700 евра).
За премиум модели како Vertu Signature, луксузното пакување, ако е во добра состојба, може дополнително да ја зголеми вредноста на телефонот, забележува Вуд. Оригиналниот Apple iPhone, во зависност од неговата состојба, може да се продаде за цена од 100 до 10.000 фунти.
Играчките конзоли од 1990-тите и 2000-тите се исто така голем хит. PlayStation 1 и PlayStation 2 се продаваат за просечно 45 фунти, додека моделите со додатоци и игри достигнуваат уште повисоки цени. Оригиналните Xbox конзоли се исто така барани, а една неодамна се продава за речиси 72 фунти.
Ким Фаура, експерт за потрошувачи во Gumtree, рече: „Ова не само што ја истакнува изненадувачката вредност на заборавената технологија, туку и покажува како повторната трговија може да им помогне на луѓето да заштедат пари и да го намалат отпадот“.
