Општина Кисела Вода денеска организираше акција за пошумување, во непосредна близина на Паркот на шахот, во населбата 11 Октомври –Бараки.
Во акцијата, во која учествуваше и градоначалничката, Бети Стаменкоска-Трајкоска, а која е само почеток на серија активности за дополнително зазеленување и унапредување на животната средина во општината, беа засадени 20 нови дрвја.
– Дрвјата се донација од Централна кооперативна банка АД Скопје, која со овој чин уште еднаш ја покажа својата општествена одговорност и својата поддршка за еколошките иницијативи на локалната самоуправа – соопштија од Општина Кисела Вода.
Градоначалничката Стаменкоска-Трајкоска истакна дека со оваа активност Општината ја потврдува заложбата за континуитет во создавањето поубава, позелена и почиста Кисела Вода.
-Пошумувањето и уредувањето на зелените површини ќе бидат еден од моите приоритети во управувањето со општината бидејќи зеленилото значи подобар квалитет на воздухот, поубава околина и поздрав живот за нашите сограѓани – изјави Стаменкоска-Трајкоска, додавајќи дека посветеноста на хигиената, уредноста и на зачувувањето на јавните површини ќе оди рака под рака со нови проекти за пошумување, создавање мини паркови и ревитализација на постојните зелени зони.
