АФП: Поради прекин на финансирањето од САД, „Радио Слободна Европа“ престанува со работа

Бугарскиот сервис на Радио Слободна Европа (RFE) ќе престане со работа на 31 март поради прекин на финансирањето од САД, дознава АФП од двајца членови на персоналот, неколку недели откако беше објавено слично сценарио за Романија.

Тимот активно работи на решение кое ќе „ни овозможи да продолжиме да им служиме на нашата публика“, рече еден од изворите во радиото, барајќи анонимност додека не се даде официјално соопштение, пренесе „Хина“.

Директорката на сервисот на „Радио Слободна Европа Романија“, Елена Вијулие Танасе, исто така го објави неговото затворање на 31 март во објава на „Фејсбук“ пред две недели.

„Ова секако е лоша вест. И не само за моите колеги и мене“, напиша таа, нагласувајќи дека „останале само неколку професионални новинари, додека овие времиња бараат наша работа на толку многу фронтови“.

Раководството на РСЕ во Прага не одговори на прашањата на АФП.

„Разбираме дека (Радио Слободна Европа) мораше да направи кратења за да ги зачува сите свои активности, вклучително и емитувањето во диктатури како Русија“, изјави за АФП Павол Салај, директор на Репортери без граници (РСФ) во Чешка.

Сепак, овие затворања „ќе го загрозат правото на граѓаните на веродостојни информации“, додаде тој, нагласувајќи дека „ризикот е уште поголем во Бугарија, која чека избори, бидејќи е земја со малку независни медиуми“.

Беше објавено дека радиото ќе биде затворено во Унгарија на крајот на ноември, како резултат на одлуката на американската влада да го смири унгарскиот националистички премиер Виктор Орбан, сојузник на Доналд Трамп. Бугарија и Романија беа меѓу првите земји опфатени од Радио Слободна Европа/Радио Либерти кога беше основано во 1950 година.

Радио станицата, делумно финансирана од ЦИА до почетокот на 1970-тите, одигра клучна улога во ширењето информации надвор од Железната завеса, и покрај редовните обиди на комунистичките власти да го попречат нејзиниот сигнал и покрај вознемирувањето на нејзините новинари.