АД ЕСМ доби грант за зелена трансформација

АД ЕСМ доби грант од 1,5 милиони евра од германската развојна банка КфВ како техничка помош финансирана од Европската Унија, наменета за зајакнување на внатрешните капацитети и забрзување на клучните активности за енергетска транзиција на компанијата.

– За ЕСМ ова е повеќе од премин кон обновливи извори на енергија, туку сериозна посветеност да станеме модерна и комерцијално конкурентна сила на европскиот енергетски пазар. Финансирањето ќе биде алатка за зајакнување на нашите внатрешни капацитети и корпоративно управување, преку финансирање на критични иницијативи за моделирање и стратешко планирање. Овој институционален фокус ја осигурува нашата оперативна одржливост, ја зајакнува енергетската безбедност на земјата и значително ги забрзува нашите напори за намалување на јаглеродниот отпечаток – изјави Лазо Узунчев, генерален директор на АД ЕСМ.

Штефан Худолин, раководител на Одделот за соработка во Делегацијата на ЕУ во земјава, истакна дека забрзувањето на зелената транзиција никогаш не било толку блиску и толку возможно.

– Со поддршката од ЕУ и гаранциите на ЕФСР+ земјата ќе добие финансиски средства и технички насоки од нашите партнери во КфВ за да ги забрза трансформацијата и декарбонизацијата на енергетскиот сектор во Северна Македонија. Оваа заедничка акција има трансформативен ефект за преминување од јаглен на зелена енергија, но истовремено придонесува за создавање на стабилен енергетски сектор во многу нестабилен климатски и геополитички свет – рече Худолин.