45 турски државјани приведени во Црна Гора по инцидентот во Забјело

Управата на црногорската полиција објави дека синоќа во просториите на Одделот за безбедност во Подгорица се приведени 45 лица, државјани на Турција и Азербејџан, кои биле предмет на кривична обработка, како и проверка на легалноста на нивниот престој на територијата на Црна Гора. Во паралелна операција, полицијата во Подгорица уапсила еден азербејџански државјанин и еден турски државјанин, осомничени за нанесување повреди на маж и извршување на кривично дело насилно однесување пред две ноќи во подгоричката населба Забјело.

Управата на полицијата објави дека црногорската полиција синоќа ја проверила легалноста на престојот на 45 приведени странски државјани од Турција и Азербејџан и дека во таа прилика се преземени соодветни мерки поради утврдените неправилности.

„Седум прекршочни потерници се издадени за прекршување на одредбите од Законот за странци, на осум странски државјани им е наредено да ја напуштат територијата на Црна Гора, додека на две лица им е наредено да останат на одредена адреса и редовно да се јавуваат во полицијата до завршување на постапката пред надлежните органи“, соопшти Управата на полицијата.

Во соопштението се наведува дека Министерството за внатрешни работи, Управата за полиција, заедно со Даночната управа и другите надлежни органи, ќе преземат конкретни мерки и активности со цел да ги утврдат сите неправилности поврзани со престојот на странски државјани на територијата на Црна Гора, како и во однос на правни, физички и одговорни лица кои работат и живеат на нејзина територија, со цел преземање соодветни рестриктивни мерки, вклучително и проверки на условите за престој и работење.

„Службениците на Управата за полиција ќе продолжат да ги интензивираат контролите на странските државјани, во согласност со Законот за странци и во соработка со други надлежни органи, и ќе преземат репресивни мерки и активности против лицата кои ги кршат прописите и законите на Црна Гора. Во случаите кога ќе се утврдат неправилности, веднаш ќе се покренат постапки за откажување на престојот и депортација на странски државјани од земјата, со цел да се зачува безбедноста на сите граѓани, да се заштити правниот поредок на државата и да се воспостави владеење на правото“, се заклучува во соопштението.