Еколози и риболовци го светнаа брегот на Дебарско Езеро

Во првата еколошка акција годинава беше исчистен брегот на Дебарско Езеро кај градската плажа и други делови, пред сè каде што има угостителски објекти, од насобраниот пластичен и друг отпад.

Акцијата се реализира по иницијатива на екологисти и спортското риболовно друштво „Трофта“, концесионер на езерото, а беше поддржана од  граѓанските организации, општинското комунално претпријатие „Стандард”, локални компании, училиштата и локалната самоуправа. 

Организаторите им ги обезбедија сите потребни материјали на учесниците: ракавици, црни пластични кеси, маички со натпис „За чисто езеро“ и освежителни пијалаци.

– Вакви акции спроведуваме пред почеток на летната сезона, кога на овој дел има стотици летувалци, како локални жители, од други градови, и нашинците од странство, кои одморот го минуваат во родниот крај. Ова е еден од најубавите делови во градот и жално е што се собира отпад. Апелираме до сите  да бидат совесни и да го зачуваме ова наше богатство – велат од друштвото „Трофта“.

Тие додаваат дека во водите на Радика завршува пластичен и друг отпад од селата по нејзиниот тек кои потоа се влеваат во езерото, но ист отпад се насобира и од несвесното однесување на дебрани, како и на жителите од подрачјето на Жупа.

Благодарение на ваквите интервенции, езерото се чисти и станува погодно за рекреација во текот на летните месеци.

Засилените контроли на рибочуварската служба на друштвото и еколошките акции се од суштинско значење за заштита на биодиверзитетот на Дебарското Езеро, кое не е само важен природен ресурс за рекреација на жителите, туку и голем потенцијал за развој на туризмот во регионот.