Ледените плочи во светот се на пат да се стопат и да се раздвижат, што ќе доведе до пораст на нивото на морето и „катастрофална“ миграција од брегот, дури и ако светот успее да направи чудо и да го задржи глобалното затоплување на ниво од 1,5 степени Целзиусови, покажа новото истражување.
Меѓународните научници сакаа да утврдат која би била „безбедната граница“ на глобалното затоплување за опстанокот на ледените плочи на Гренланд и Антарктикот. Тие ги разгледаа студиите кои земаат податоци од сателити, климатски модели и докази од седименти од длабоко море, па дури и од ДНК на октоподи.
Светот се обврза дека ќе го ограничи глобалното затоплување на 1,5 степени Целзиусови, за да ги спречи најкатастрофалните влијанија од климатските промени.
Сепак, не само што оваа граница е недостапна, туку и најалармантното откритие на студијата покажа дека дури и граница од 1,5 степени можеби не е доволна за зачувување на ледените плочи.
Дури и ако тоа се случи, сепак може да има брзо повлекување на ледената покривка и катастрофално зголемување на нивото на морето, открија научниците. Ледените плочи на Гренланд и Антарктикот заедно содржат доволно свежа вода за да го подигнат глобалното ниво на морињата за околу 65 метри.
Топењето на мразот е доминантна причина за порастот на нивото на морето, а стапката на годишен пораст на нивото на морето е двојно зголемена во текот на изминатите 30 години. Експертите сега веруваат дека светот треба да се подготви за драстично зголемување на нивото на морето во наредните векови.
Ова е и егзистенцијална закана за светското крајбрежно население. Околу 230 милиони луѓе живеат на помалку од еден метар надморска височина. Дури и малите промени во количината на мраз ќе предизвикаат длабока промена на глобалните крајбрежја, ќе расселат стотици милиони луѓе и ќе нанесат штета што ги надминува границите на адаптација.
Сè уште има огромни несигурности за тоа каде лежат пресудните точки. Начинот на кој се развиваат климатските промени не е линеарен и не е јасно точно кога затоплувањето може да предизвика брзо повлекување, па дури и колапс.
Она што е крајно вознемирувачко, велат авторите на студијата, е тоа што проценките за „безбедни“ температурни прагови за спас на ледените плочи продолжуваат да се намалуваат бидејќи научниците подобро ја разбираат нивната ранливост на климатските промени.
Раното моделирање сугерираше дека температурите ќе треба да достигнат околу три степени на затоплување за да се дестабилизира ледената покривка на Гренланд, на пример, но неодамнешните проценки сугерираат дека ќе бидат потребни само околу 1,5 степени.
За да се избегне брзиот колапс на една од многуте ледени плочи, неопходно е да се ограничи глобалното затоплување на еден степен над прединдустриските нивоа, заклучија авторите на студијата.
Тоа би барало драстично намалување на количината на фосилни горива што луѓето ги согоруваат, нешто што изгледа крајно неверојатно бидејќи земјите, вклучително и САД, продолжуваат да прифаќаат нафта, јаглен и гас.
(Си-Ен-Ен)
