Зеленски тргна за Берлин, на разговори со Мерц за крај на војната

Украинскиот претседател Володимир Зеленски пристигна во Берлин, каде ќе разговара со германскиот канцелар Фридрих Мерц, соопшти германската влада, како дел од дипломатските напори за ставање крај на војната во Украина.

-Фокусот на посетата ќе биде поддршката на Германија за Украина, како и напорите за постигнување прекин на огнот, се додава во соопштението.

Додека Трамп покажа колеблива поддршка за Украина во последните месеци, Германија би можела да игра сè поважна улога како најголем воен и финансиски поддржувач на земјата по САД.

Конзервативецот Мерц, кој стана канцелар овој месец, вети дека ќе преземе поголема водечка улога во обезбедувањето поддршка за Украина од својот претходник, социјалдемократот Олаф Шолц.

Тој ја посети Украина со други европски лидери неколку дена откако стана канцелар, а во понеделникот го поддржа правото на Украина да лансира ракетни напади со долг дострел на руска територија за разлика од претпазливата реторика на Шолц по ова прашање.