Италијанскиот кошаркарски репрезентативец Алесандро Џентиле не може без скандали. Некогаш најталентираниот италијански кошаркар оваа сезона ја започна во Варезе, но тешко дека ќе ја заврши во овој клуб.
Иако е најдобар играч на тимот оваа сезона и просечно бележи по 14.8 поени по меч, конфликтот со тренерот најверојатно го заврши неговиот ангажман во овој клуб.
Холандскиот тренер Јохан Ројкаерс го исфрли од тренинг, а локалните медиуми јавуваат дека Џентиле после тоа ги собрал сите свои работи и го напуштил клупскиот тренинг комплекс.
Наводно, ова не е прв конфликт меѓу играчот и тренерот, па сега искусниот Џентиле, некогаш проектиран за НБА, ќе мора да бара нов клуб. Засега играше за Бенетон, Олимпија Милано, Виртус, Тренто и Варезе дома, а во странство за Панатинаикос и Хапоел Ерусалим.
Тој беше избран од Минесота на драфтот во 2014 година, но никогаш не заигра во најдобрата лига на светот.
