Петстотини илјади кинески вакцини од производителот „Синовак“ пристигнуваат утре во 9.30 часот, на Скопскиот аеродром. Со овие дози вакцини ќе се имунизираат сите досега пријавени на вакцинација.
Во земјава вчера попладне пристигнаа уште 100.620 дози вакцини на „Фајзер“, што се набавени преку КОВАКС механизмот, откако пред две недели стигнаа 30.000 дози од кинеската вакцина од „Синовак“.
„Вакцинацијата се одвива непречено на сите пунктови низ државата. Вкупно се аплицирани 510.351 дози вакцини, а ревакцинирани се 214.571 граѓани, објави денес министерот Филипче на Фејсбук.
Министерот за здравство Венко Филипче уверува дека од понеделник вакцини ќе има доволно за 300 илјади граѓани, а од оние што се пријавени на сајтот vakcinacija.mk останати се 150 илјади кои чекаат да ја примат првата доза. Потоа ќе продолжи имунизацијата, но на терен секаде каде што ќе има интерес од страна на граѓаните, без разлика на нивната возраст.
