Министерството за финансии го изготви Предлогот на законот за изменување на Законот за Македонската банка за поддршка на развојот(МБПР), со кој оваа банка, која е единствена во државна сопственост, го менува името во Развојна банка на Северна Македонија (РБСМ).
Како што е појаснето, оваа измена се врши поради усогласување со Амандманот 33 од Уставот на Република Северна Македонија.
Освен името на банката, се менува и името на државата, од Република Македонија во Република Северна Македонија, секаде каде што е споменато во текстот на законот.
Инаку, со Законот за Македонската банка за поддршка на развојот се уредуваат целите, задачите, активностите, работењето и организацијата на таа банка, која е единствена во државна сопственост.
Со оваа интервенција, освен усогласувањето со Уставот, се задира и во нејзините надлежности, па се предлага нов член два, кој гласи:
-Република Северна Македонија може да го зголемува почетниот капитал на РБСМ со уплата на средства од Буџетот на Република Северна Македонија, како и од други средства на Република Северна Македонија врз основа на одлука на Владата на Република Северна Македонија. Зголемувањето се врши со соодветно зголемување на бројот на акциите на РБСМ“.
Се менува и членот 4 и со таа измена идната Развојна банка нема да може да и одобрува кредити или да ú издава гаранции и други форми на обезбедување на Република Северна Македонија и на буџетските корисници и единките корисници на средства од Буџетот на државата.
Неодамна оваа банка доби и нов директор. Нејзин прв човек кој дојде на местото на Кире Колемишевски сега е министерот за финансиски во владата на Бранко Црвенковски, Никола Поповски.
Исто така, уште пред еден месец, распишан е и конкурс за ново лого на банката. (С.В.)