Шпанскиот тенисер Рафаел Надал не успеа да ја заврши годината на врвот на светската ранг листа, но е задоволен од постигнатиот успех во сезоната. Шпанецот има еден грен слем повеќе од српскиот тенисер Новак Ѓоковиќ и ќе се обиде да го одбрани трофејот во Мелбурн во јануари наредната година.
Иако Надал неодамна изјави дека е неизвесно уште колку ќе може да игра, поранешниот број еден, Швеѓанецот Матс Виландер, е уверен дека тој се уште не кажал се што има на теренот.
-Бидејќи освои грен слем, би рекол дека има уште најмалку три или четири години во него, сигурно, ако остане меѓу осумте најдобри. Значи, ако ги освои Австралија Опен и Ролан Гарос годинава, тогаш верувам дека може да игра многу повеќе, вели Виландер.
Не го загрижува фактот што Надал има 36 години и полека се ближи до четириесет.
-Не сум загрижен што Рафа се приближува на 40. Мислам дека тоа не е важно, бидејќи тој го има тоа во неговата глава и ќе може да каже, еј, момци, јас сум тука и го правам ова од 17 или 18 години. Се играат пет сета, тоа е маратон, но ако спринтираш, ќе се убиеш, а ако си бавен, тој ќе биде побрз од тебе, додаде Матс.
Сепак, Виландер смета дека на Надал нема да му биде лесно да остане на врвот.
-Ќе му биде многу незгодно да се одржи во самиот врв. Мислам дека би му било полесно да освои уште еден грен слем отколку да остане во првите три во светот, бидејќи тоа не му треба. Мислам дека важно е паметно да планира каде сака да игра, да влезе во форма. Една недела пред Австралија опен, Ролан Гарос, Вимблдон и САД Опен. Рафа знае што бара и емотивно и физички. Знае колку мора да тренира за да има шанса да го постигне сето тоа. Ако се оди добро со повредите, ќе успее. Ќе му треба среќа, се разбира, но тој би рекол дека отсекогаш било така. Кога победуваш многу, ти треба среќа, па мислам дека се ќе биде во ред, заврши Виландер.
