Главниот американски епидемиолог д-р Ентони Фаучи во големото интервју за „Бизнис инсајдер“ вели дека веројатно никогаш нема да се ослободиме целосно од коронавирусот, но дека тој е доста убеден дека до 2022 година ќе можеме да продолжиме да живееме како пред пандемијата – секако ако се развие безбедна и ефективна вакцина и доколку се спроведат мерки за заштита на јавното здравје.
„Верувам дека до крајот на 2021 година, ако имаме безбедна и ефикасна вакцина до крајот на оваа календарска година – и јас сум оптимист дека ќе го направиме тоа – ќе можеме да живееме нормално. Малку е веројатно дека вакцината ќе биде достапна во октомври, но ќе видиме, никогаш не знаете“, изјави Фаучи за „Бизнис инсајдер“.
Тој посочи дека се надева дека ќе има доволно вакцини за сите на кои им треба, но и дека милијардите дози што треба да се обезбедат ќе бидат фер дистрибуирани низ целиот свет.
„Можеби нема целосно да го елиминираме вирусот, но ако го потиснеме доволно и заштитиме доволно луѓе – или со вакцина или со ширење на инфекцијата – ќе развиеме имунитет на стадо што ќе спречи појава на епидемии“, изјави водечкиот американски епидемиолог.
Запрашан како безбедно да го поминуваме времето додека не стигнеме до точка каде што ќе можеме да се вратиме во вообичаените рутини, тој истакна дека генерално работи и го поминува времето со својата сопруга и неколку пријатели и дека е добро што никогаш не е со повеќе од четири или пет лица.
Бидејќи светските медиуми неодамна ги објавија препораките на д-р Фаучи за земање витамини, тој објасни во интервју за „Бизнис Инсајдер“ дека советува да се зема витамин Д доколку има недостаток во организмот, бидејќи постојат докази дека луѓето со недостаток на витамин Д се подложни на инфекции.
Сепак, тој истакна дека никакви мултивитамини или хербални препарати кои се популарни како засилувачи на имунитетот всушност не помагаат и дека тие би можеле да имаат добар плацебо ефект.
Ако навистина сакате да го зајакнете имунитетот, советува Фаучи, држете се до златните правила: доволно спиење, квалитетна исхрана, избегнување на стрес.
Многумина стравуваат како ќе изгледа секојдневието кога ќе дојде зимата. Не само што ризикот од судир на коронавирус и сезонски грип ќе биде поголем, туку ќе биде многу потешко да се дружите додека се почитува физичката оддалеченост.
„Разговарав со мојата сопруга и единственото нешто што е сигурно е дека ќе мора да направиме многу повеќе работи дома отколку порано“, рече д-р Фаучи, додавајќи дека ќе продолжи да биде клучно секој да се заштити себе си најдобро што може.
На прашањето колку време ќе треба да помине од вакцината додека не можеме повторно да застанеме рамо до рамо со други луѓе, да се собираме во кафулиња како порано, д-р Фаучи одговори дека ќе биде потребно повеќето луѓе едноставно да се вакцинираат.
„Верувам дека ова може да се случи, како што реков, до крајот на 2021 година“, истакна д-р Фаучи, додавајќи дека истото важи и за рестораните и концертите.
Кога станува збор за вакцината, тој изјави дека стравот дека работите одат премногу брзо е неоправдан.
„Луѓето треба да разберат дека брзината нужно не ја загрозува безбедноста на вакцините или научниот интегритет“, рече д-р Фаучи. „Фактот што имаме можност да направиме толку брз напредок во развојот на вакцините е одраз на извонредниот технолошки напредок што е постигнат во областа на развојот на вакцините.
Тој се осврна и на зборовите на директорот на американскиот Центар за контрола и превенција на болести, д-р Роберт Редфилд, кој неодамна рече дека вакцината ќе обезбеди заштита од околу 70 проценти. Дали тоа значи дека ќе мора да носиме маски и покрај вакцината?
„Како што реков, единствениот пат до точката каде што ќе можеме да живееме нормално е комбинација на вакцина и придржување кон мерките“, заклучи д-р Фаучи.
