Претседателите на Друштвото на ликовни уметници на Македонија (ДЛУМ) со по едно дело ќе се претстават пред македонската јавност во рамките на изложбата што на 13 ноември (14 часот), ќе биде отворена во новиот галериски простор „Арт Хаб“ (Арт Хуб) – уметнички центар, на вториот кат во Градскиот трговски центар. Според актуелниот претседател на ДЛУМ, Филип Фидановски на изложбата ќе бидат изложени дваесет дела кои беа обезбедени, поточно дела на дваесет од вкупно триесет досегашни претседатели на ДЛУМ, кое постои речиси 75 години.
„Изложбата симболично ќе биде отворена на 13 ноември – Денот на ослободувањето на Скопје. На градот му требаат урбани простори, му требаат уметнички галерии, му требаат културни настани кои, за жал, се помалку ги има“, истакнува Фидановски.
Пред јавноста ќе бидат претставени делата на Никола: Мартиновски, Борко Лазески, Драгутин Аврамовски-Гуте, Вангел Коџоман, Миле Корубин, Коле Манев, Глигор Чемерски, Мирослав Масин, Петар Хаџи-Бошков, Нове Франговски, Томе Серафимовски, Борко Митриќески, Ѓорѓи Чулаковски-Ѓото, Љубомир Белогаски, Петар Мазев, Константин Танчев –Динка, Сергеј Дамовски, Христијан Санев, Филип Фидановски и Тања Балаќ. По изложбата која ќе трае до 25 ноември ќе биде издаден и каталог во кој ќе бидат застапени сите претседатели на ДЛУМ.
Фидановски посочи дека иако уметничкиот центар не е во сопственост на ДЛУМ, Друштвото склучило договор со кој 120 денови во годината бесплатно може да го користи галерискиот простор каде ќе организира дел од своите програмски активности.
ДЛУМ нема сопствен галериски простор, иако со години се обидува да го добие од државата.
