Град Скопје по примерот на големите европски метрополи ќе им овозможи бини на уличните уметници каде што ќе можат да настапуваат. Такви мали бини ќе бидат поставени на седум локации и покрај нив ќе има и уметнички инсталации, маси за играње шах, фонтани, осветлување, детски реквизити, улична библиотека, паметни клупи и многу зеленило, дрвја и цвеќиња.
Ова е предвидено со тендерот кој го распиша Град Скопје со кој се бара седум неуредени локации во градот да се уредат во скверови во кои ќе биде поставена бараната урбана опрема.
– Паметните клупи треба да располагаат со приклучоци за полнење мобилни телефони, безжичен интернет и ноќно осветлување. На дел од локациите се бара да се предвидат и уметнички инсталации и мала бина за улични уметници – информираат од Град Скопје.
Од Градот појаснуваат дека локациите потекнуваат од проектот на Центарот за иновации на град Скопје – Скопје Лаб.
– Минатото лето започнаа активностите каде на граѓаните им се даде можност да предложат содржини и начини за уредување на поголем број на зелени површини. Тоа се вршеше преку пополнување на разни прашалници (на терен и електронски), како и преку посебни интерактивни мапи – велат градските власти.
Оттаму додаваат дека во пилот проектот биле селектирани 12 локации, а од истите се избрани посочените седум.
Тимот на Центарот за иновации на град Скопје (Скопје Лаб) во месец јули работеше на иницијатива за дизајнирање на зелени јавни површини/паркови, кои потоа Град Скопје треба да ги ревитализира (озелени и облагороди со урбана опрема) и ќе се обиде да ги „оживее“ приказните од минатото за тие локации, доколку има такви.
– Ова иницијатива дојде на предлог од наш граѓанин кој имаше мапирано дваесетина локации во градот на кои им треба ревитализација. Доколку иницијативата покаже успех континуирано ќе се работи на мапирање и дизајнирање на нови јавни површини во Скопје кои може да се уредат во согласност со потребите на граѓаните – велат од тимот на Скопје Лаб.
Сквер е предвиден кај Под Кале, кај зелениот простор кај Мартиновски, и е со површина од околу 2.600 квадратни метри. Зелениот простор спроти „Рамстор“ (Стопанска банка на булеварот „Јане Сандански“) е со површина од околу 2.000 квадратни метри. Урбаната зелена површина до слаткарница „Палма “ „Парк со летниковец“, во општина Аеродром има 1.068 квадрати. Ќе се уреди и потегот покрај булеварот „Кузман Јосифовски – Питу“ – од НБРМ до мостот „Мајка Тереза“ на река Вардар и е со површина од 680 квадратни метри. Уредување ќе претрпи и зелениот простор на аголот помеѓу булеварот. „Илинден“ и улицата „Никола Тесла“ во општина Карпош што е на површина од 1.470 квадратни метри, потоа паркот кај маркетот „Веро“ и пожарна во Карпош, на површина од 1.000 квадратни метри, како и кај паркот пред и позади амбулантата „Млин Балкан“ до маркетот „Веро“ во Центар, на површина од 585 квадратни метри.
(А.П.)