Амбасадата на Кина со донација за весникот ВЕЧЕР, МИА и МРТВ

133

Со заеднички напори, без дискриминација да се бориме против пандемијата на Ковид-19 и со меѓусебна соработка на земјите во светот да го зајакнеме здравствениот систем за благосостојбата на целото човештво, бидејќи тоа нема да биде во корист на една земја, туку на целиот свет, порача денеска амбасадорот на НР Кина во Македонија, Џанг Ѕуо, кој истакна дека кон крајот на месецот се очекува да пристигне кинеската помош за земјава.

Амбасадорот Ѕуо во кинеската амбасада им додели донации на весникот ВЕЧЕР, МИА и МРТВ, која се состои од  заштитни ракавици, средства за дезинфекција на раце и површини и во таа прилика нагласи дека состојбата со пандемијата не смее да се политизира.

-Имаше обиди за политизација на пандемијата, на оцрнување на Кина. Кога гледам извештаи за починати од вирусот навистина сум многу трогнат, затоа сум против тоа Ковид-19 да се политизира, бидејќи вирусот не познава граници и ниту една држава сама не може да ја победи пандемијата, рече кинескиот амбасадор и додаде дека во текот на борбата против вирусот во Кина, неговата земја добила поддршка од над 140 држави.

Тој нагласи дека граѓаните на земјава, како и кинеските граѓани се борат против пандемијата и додаде дека двете земји се заедно во таа борба и оти заедништвото е начинот на кој може да се извојува победа.

Амбасадорот соопшти дека кон крајот на овој месец е планирано да пристигне кинеската помош за Македонија. Со властите на земјава се уште го договараат прецизниот датум, бијдеќи како што рече, тешко е во моментов да се организира транспорот.

Деновиве, како што информираше амбасадорот во интервју за венсикот ВЕЧЕР, имало контакти и на ниво на збратимени градови за помош во справувањето со Ковид-19. Збратимениот град на Скопје, Нан Чанг планира да испрати 50 илјади маски, збратимениот град на Прилеп, Де Јанг планира да испрати заштитни одела.

– Велиме пријателот во неволја е поблизок и од брат и затоа ние заедно ќе победиме, рече кинескиот амбасадор при доделувањето на донациите и им се заблагодари на медиумите, бидејќи ја информираат јавноста за пријателството и соработката меѓу двата народа. 

Редакцијата и раководството на весникот Вечер изразува благодарност до нашите пријатели од амбасадата на НР Кина во земјава, кои и во овие тешки времиња на глобална пандемија ни даваат поддршка.