По повеќе од 50 години: НАСА го испраќа првиот екипаж околку Месечината – мисијата „Артемис II закажана за 6 март

НАСА планира да ја лансира мисијата „Артемис II“ на 6 март, првата мисија со екипаж во орбитата околу Месечината по повеќе од 50 години. Тоа ќе биде и најдолгото човечко патување во вселената. Четири астронаути ќе полетаат на 10-дневно патување околу другата страна на Месечината и назад, отворајќи го патот за идните слетувања на Месечината, пишува „Би-би-си“.

Датумот на лансирање беше одреден по успешната „мокра генерална проба“, клучен тест пред лансирање за време на кој ракетата се полни со гориво и поминува низ целосно одбројување. Тоа беше втора таква проба на тимот „Артемис“ во Вселенскиот центар „Кенеди“ во Флорида.

Првиот обид, одржан на почетокот на февруари, беше прекинат поради истекување на водородно гориво на лансирната рампа. На прес-конференција, Лори Глејз од НАСА потврди дека проблемите, вклучително и оние со заптивките и филтрите, сега се решени.

„Вчера успеавме целосно да ја наполниме ракетата SLS со гориво според распоредот и успешно спроведовме симулација на одбројување на лансирањето“, рече таа.

Екипажот на „Артемис II“ (Artemis II) се состои од тројца Американци – Рид Вајзман, Виктор Гловер и Кристина Кох – и Канаѓанецот Џереми Хансен. Патувањето ќе започне со џиновската ракета на НАСА, висока 98 метри, систем за вселенско лансирање (SLS). Ракетата летала само еднаш претходно, во ноември 2022 година, за време на мисијата „Артемис I“(Artemis I), но тогаш без екипаж.

Астронаутите ќе бидат сместени во капсулата Орион на врвот на ракетата. Внатрешноста на вселенското летало со големина на минибус ќе биде нивниот дом во следните десет дена, каде што ќе живеат, јадат, работат и спијат.

Првиот ден од мисијата ќе го поминат во орбитата на Земјата. Доколку сите системи се во ред, тогаш ќе се упати кон Месечината. Патувањето до Месечината ќе трае околу четири дена, а вселенското летало ќе ја заобиколи нејзината далечна страна, страната што никогаш не се гледа од Земјата.

Ќе лета на надморска височина помеѓу 6.500 и 9.500 километри над површината на Месечината, а неколку часа ќе бидат посветени на проучување и фотографирање на Месечината. По прелетувањето, ќе започне четиридневно враќање на Земјата. Мисијата ќе заврши со слетување на капсулата во Тихиот Океан, пренесе „Индекс“.