Маж од Вирџинија во САД е уапсен и обвинет за упатување смртни закани кон потпретседателката и демократска претседателска кандидатка Камала Харис.
Френк Лусио Карило упати повеќе закани кон Харис, претседателот Џо Бајден и директорот на ФБИ Кристофер Вреј на десничарската платформа за социјални медиуми Гетр.
ФБИ откри 4.359 објави на Карило „кои се насочени кон различни јавни службеници“, вклучувајќи ја и Харис.
Во неколку објави, Карило, наводно, се заканил дека ќе и ги „извади очите“ на Камала Харис и опишал различни начини на кои сакал да ја убие потпретседателката. Карило исто така ја нарече Харис „курва“ и рече дека се надева дека „ќе умре во агонија“.
Кај Карило исто така е пронајдена и една исламофобична објава од 2023 година кога напишал дека луѓето треба „да излезат со пушки и да ги убијат сите муслимани“.
Кога агентите на ФБИ првпат пристигнале во домот на Карило за објавите на социјалните мрежи, тој ги прашал дали се таму „за работи на Интернет“ и признал дека тој самиот ги објавил заканите и навредите.
Во неговата куќа нашле и две огнени оружја, а сега ќе следи рочиште на кое ќе се одлучува дали Карило ќе остане зад решетки.
