Од „Шанса за Центар“ реагираат дека ниту фелата, ниту граѓаните не биле прашани за измените на Законот за урбанистичко планирање, но дека за нив се резервирани само последиците.
-Ветувањата за нови пракси во урбанизмот остануваат само за во изборните кампањи. Со старото однесување не можеме да добиеме подобри и поквалитетни решенија. А праксата на новата Влада со целосно нетранспарентното носење на измените на Законот за урбанистичко планирање по скратена постапка нѐ потсетува дека лекциите од минатото не се научени, ниту однесувањето е променето, а штетите ќе се зголемуваат – потенцираат од „Шанса за Центар“.
Тие додаваат дека со ова ќе продолжат да се применуваат старите ДУП-ови кои предизвикаа урбанистичка катастрофа во Центар и во другите општини и оти ќе продолжат да се изработуваат ДУП-ови по стари правилници, закони, неточни податоци и мерења.
-Ќе никнуваат катни гаражи по преостанатите слободни јавни површини каде ќе им текне. Ќе се кројат планови во кабинети во интерес на мала група на моќници. Со ова се потврдува правилото: „закони може да се менуваат и преку ноќ, ама ДУП-овите од пред 2012 не смеат да се променат по никоја цена ни во 2024 година“- сметаат од „Шанса за Центар“ и прашуваат: Што е следно? Повторно носење на ДУП-ови во 3 часот наутро?
(А.П.)
