Српската пошта денеска соопшти дека косовската полиција на административниот премин Јариње запрела комбе на Пошта Србија со писма, кое сообраќа на редовната линија на транспортната линија Рашка – Грачаница.
Како што наведуваат од Пошта на Србија, запирањето комбиња и приватни пратки за жителите на Косово следува по вчерашната рација во девет филијали во четири општини на северот на Косово кои од вчера се затворени, а документите одземени, додека директорот и менаџерите однесени на информативно интервју.
„Последната акција на косовската полиција ја влошува состојбата и ја зголемува загриженоста кај српското население, затоа укажуваме на итноста за решавање и смирување на тензиите, суспендирање на сите дејствија кои се против претходно постигнатите договори и овозможување непречено функционирање на поштенскиот сообраќај во северот на Косово и Метохија“, соопштија од Пошта на Србија.
