Шведскиот натпреварувач во скок со стап, Арманд Дуплантис-Мондо (24), го освои златото на Олимписките игри во Париз, соборувајќи го светскиот рекорд од 6,25 метри! Интересно е тоа што за него, покрај целиот стадион, навиваа и колегите во скок со стап, пред сè директните ривали – сребрениот Американец Сем Кендрикс (5,95) и бронзениот Грк Емануил Каралис (5,9). Сите сакаа да успее Дуплантис, кој на крајот успеа, постигнувајќи го најдобриот резултат во својата долга кариера.
Тој по втор пат победи на Олимпијада, бранејќи го златото од Токио, во 2021 година. Покрај тоа, тој е двократен светски шампион и на отворено и на затворено.
Момчето од Луизијана, кое се натпреварува за Шведска, земјата на мајка му, го собори светскиот рекорд по деветти пат, но за прв пат на Олимпијада. Од 8 февруари 2020 година, тој поставуваше нови светски рекорди, сантиметар по сантиметар, но овој понеделник го направи тоа за прв пат на Олимписките игри во Париз. Претходно, во април оваа година, тој го постави светскиот рекорд од 6,24 во Кина.
За да го освои златото, му беше доволно да ја прескокне штицата на шест метри, но потоа ја постави на 6,25 за да го подобри својот светски рекорд за само еден сантиметар. Првите два пати не успеа, но во третиот обид си го исполни сонот.
