Јапонската информативна агенција објави дека по ударите на супертајфунот „Хагибис“ кој предизвикал поплави и свлечишта загинале 19 лица, повеќе од 100 се повредени, а 16 луѓе се водат како исчезнати.
Спасувачките тимови со хеликоптери и чамци се испратени во погодените области за да му помогнат на населението загрозено во поплавените домови.
Бројот на загинати и повредени и понатаму се зголемува. Бројката која ја објавил Кјодо е многу поголема од онаа на Владата.
Портпаролот на Владата Јошихиге Суга претходно изјавил дека по тајфунот „Хагибис“ загинале седум лица, а 15 се водат како исчезнати. Тој воедно истакнал дека предизвиканата штета е огромна и дека околу 376 000 домови останале без електрична енергија, а 14 000 без вода за пиење.
Јапонската метеоролошка служба издаде предупредување за Токио и околината, наведувајќи дека ваков интензитет на врнежи е забележан еднаш на 60 години. Според јапонските медиуми, количината на дожд која ја донесе „Хагибис“ би можела да ја надмине количината од најсилниот тајфун од 1958 година. Инаку, тајфунот „Ида“ кој во 1958-ма година ја погоди Јапонија однесе 1.200 животи, а предизвика и излевање на реките од коритата и огромна материјална штета.
