По мировните преговори меѓу Русија и Украина што во вторникот се одржаа во Турција, во медиумите се појави нацрт на украинските услови за деескалација на конфликтот. Украина бара меѓународен договор кој ќе содржи пет клучни точки, за да се согласи на неутралноста што ја бара Русија.
Тој договор практично би бил гаранција за безбедност на украинската страна.
Првата точка би се однесувала на заштита од меѓународните сили во случај на напад. Имено, Западот би бил обврзан да и пружи воена помош на Украина во рок од три дена од почетокот на секој напад – војна, агресија или воена операција, пренесува Нова.рс.
Таа воена помош би се однесувала и на „затворање на небото“, поточно воведување зона на забранети летови над Украина, која Западот и НАТО во моментов немаат намера да ја воведат од страв дека ќе предизвика проширување на војната. Тоа практично значи дека системот за воздушна одбрана на НАТО мора да го собори секој авион што се наоѓа во воздушниот простор на Украина, што Русија би можела да го искористи како причина да ги нападне членките на Алијансата.
Гаранти за безбедноста на договорот би биле 11 земји, пред се постојани членки на Советот за безбедност на ОН – САД, Кина, Франција, Велика Британија, но и Русија. Било споменато дека „за ова ќе се разговара посебно“.
Украина сака уште шест земји меѓу гарантите: Турција, Германија, Канада, Италија, Полска и Израел.
Исто така, договорот би вклучувал и решавање на прашањето за самопрогласените Народни републики Доњецк и Луганск. Според ова, се претпоставува дека ќе се реши статусот на овие две територии и дека Украина ќе мора да направи одредени отстапки на руската страна.
-Ќе се реши и прашањето за Крим, кој би бил посебна точка, а според предлогот на Украина, преговорите за статусот на овој полуостров би се воделе 15 години, потврди советникот на шефот на кабинетот на претседателот на Украина, Михаил Подољак.
-Предлагаме да се утврдат позициите на Украина и Русија на 15 години за да се водат билатерални преговори за статусот на Крим и Севастопол. Украина и Русија нема да користат вооружени сили или какви било сили за решавање на прашањето за Крим во овој период. Предложивме руската страна да издвои забрана за употреба на воена сила како посебна ставка“, рече Подољак.
Последната точка од договорот ќе се однесува на пристапот на Украина во Европската унија. Сите земји гаранти за безбедност не треба да се противат на влезот на Украина во ЕУ и би било пожелно да и се помогне во тој процес.
Сепак, Подољак посочи дека сите овие предлози треба да бидат одобрени од граѓаните на Украина.
„Клучно е да ја добиеме поддршката од нашите граѓани за таков договор“, нагласи советникот на шефот на кабинетот на украинскиот претседател.
Што вели руската страна?
Од друга страна, извори за „Фајненшл тајмс“ велат дека и Русија има јасни услови за потпишување мировен договор.
Имено, се наведува дека Русија нема да се противи на членството на Украина во ЕУ, но сепак инсистира на неутралност и останување надвор од НАТО.
Исто така, Москва бара Украина да се откаже од развојот на нуклеарно оружје и да не дозволи присуство на странски воени бази на нејзина територија.
За возврат, Украина ќе добие како што Русија го нарекува „формулирање слична на членот пет од Повелбата на НАТО“, а безбедносните гаранции ќе дадат земјите-членки на Советот за безбедност.
