Шилегов: Скопје веќе не е за едни мајка, за други маќеа

54
Коалицијата „Најдоброто за мојата Општина“ предводена од СДСМ во Бутел и во Скопје ќе слави победа уште во првиот круг, рече вечерва скопскиот градоначалник Петре Шилегов кој заедно со градоначалникот Велимир Смилевски оствари повеќе средби со жителите од оваа општина. Тие беа придружувани од носителките на советничките листи за Град Скопје и за Општина Бутел, Софија Пејкова и Оливера Ливриниќ.
– Бутел денес е една од општините со најмногу важни капитални проекти и затоа најбрзо се развива. Во Бутел изминатиот мандат вложивме многу затоа што 30 години ВМРО-ДПМНЕ ја забораваше оваа исклучително важна општина за развојот на нашето Скопје. ВМРО-ДПМНЕ спротивно на тоа што денес се случува го развиваше само центарот на Скопје со мегаломанскиот проект „Скопје 2014“, каде што на 1 километар квадратен вложи над 700 милиони евра во барок, споменици и градби кои сега се распаѓаат, рече Шилегов.

Според него, ВМРО-ДПМНЕ трошеше стотици милиони евра за партиски музеи, партиски плоштади, партиски цркви, а партиската „Бела палата“, нагласи, е споменик на урбаната мафија во Скопје.

Шилегов обвини дека ВМРО-ДПМНЕ е одговорно не само за зголемениот јаз меѓу центарот и периферијата, туку и за создавање поделби и конфликти меѓу скопјани од левата и десната страна на Вардар.

– Скопје веќе не е за едни мајка, а за други маќеа, како што беше кога урбаните мафијаши од ВМРО-ДПМНЕ го бетонираа Скопје со мегаломанскиот проект „Скопје 2014“, кој ги продлабочи поделбите, конфликтите и разликите помеѓу центарот и периферијата на Скопје, потенцираше Шилегов.

Со изградбата на булеварот „Христијан Тодоровски Карпош“, додаде, обезбеде е побрз излез на скопската обиколница преку модерно булеварско решение со тротоари, вело-патеки, лед осветлување, средишно и странично зеленило. И некогашната улица „Босна и Херцеговина“, рече, сега е булевар со велосипедски и пешачки патеки, ново зеленило и ново осветлување. Реконструирани се улиците „Александар Урдаревски“, „Лазо Трповски“ и „Боца Иванова“, а почнува и реконструкција на улицата „Бутелска“.

– Во наредниот мандат го пробиваме булеварот Хрватска и ќе го продолжиме бул. Словенија до Ѓорче Петров и со тоа северниот магистрален прстен конечно ќе стане целина. Со тоа се остварува долгогодишниот сон за поврзување на Бутел и Автокоманда со булеварско решение од булеварот Босна и Херцеговина и Христијан Тодоровски – Карпош до Естекада. Новиот булевар оди заедно со нови линии на јавниот превоз, нови велосипедски и пешачки патеки, најави Шилегов.

Во делот на зеленилото, тој нагласи дека само во Бутел се подигнати над 73.000 метри квадратни нови и реконструирани паркови површини, со засадени над 1.800 садници.

Осврнувајќи се на реализираното во делот на образованието, Пејкова истакна дека во овој дел од градот целосно се реконструирани средните училишта „Арсениј Јовков“ и „Зеф Љуш Марку“, а обезбедени се и прочистувачи за воздух за секоја училница.

– Вие сте моќта на овие избори, вие сте гаранција за победа што значи континуитет и грижа за секој човек, за секое семејство. Вие сте гаранција дека Скопје нема да запре, дека нема да назадува, вие сте гаранција дека ќе го градиме Скопје какво што вие сакате, вие сте гаранција за победа иднината наместо на минатото. Затоа е важно да излеземе на 17 октомври и да избереме континуитет за европско, уредно и зелено Скопје на среќни луѓе, нагласи Пејкова во своето обраќање пред жителите на Бутел.