Шаќири: МОН вложува и во урбани и во рурални средини, сите деца имаат право на квалитетно образование

33

Министерството за образование и наука и локалните самоуправи се упатени на секојдневна соработка затоа што обезбедувањето на квалитетно образование е од заемен интерес. Ова на денешната средба го потврдија ресорниот министер Јетон Шаќири и градоначалниците на општините Боговиње и Долнени Бесник Емшиу и Урим Ибески.

Како што соопшти Министерството за образование и наука, на средбата Шаќири и градоначалниците разговараа за одвивањето на воспитно-образовниот процес во двете општини и начините за негово унапредување.

Министерот Шаќири добил уверување од градоначалниците дека сите општински училишта се подготвени за почеток на второто полугодие со физичко присуство на учениците, што е во најдобар интерес на учениците. Како и во првото полугодие, наставата ќе се одвива со почитување на протоколите и мерките за заштита.

Градоначалниците, како што се наведува, побараа од Министерството да продолжи инвестирањето во училишните објекти и опремата, како услов за поместување кон повисоки стандарди на образование на децата.

Министерот Шаќири нагласи дека МОН вложува подеднакво во сите општини, без оглед дали се тие урбани или рурални средини, независно од етничкиот состав на учениците, затоа што сите деца имаат право на квалитетно образование.