Бранителот на титулата во Ракометната Лига на шампиони, тимот на Барселона останува перфекнта во новата сезона, откако на домашен терен забележа победа над словенечкиот Целје Пивоварна Лашко со 38:30.
Каталонскиот гигант одигра квалитетно прво полувреме против тимот кој во претходното коло режираше голема сензација и го победи бундеслигашот Кил. Момците на Ортега ја имаа контролата во текот на сите триесет минути и на погонот на Дика Мем и Ване на полувреме заминаа со предност од четири гола (19:15). Но, во вториот дел се соочија со големи проблеми, словенечкиот тим не само што ја анулира негативата, туку и за првпат поведе (25:24). Сепак, искусниот шпански стратег успеа да го врати својот тим во колосек и Каталонците со моќни последни десет минути стигнаа до нова победа во елитното клупско натпреварување.
Дика Мем со десет и Ване со седум гола беа предводници на бранителот на титулата до третата овосезонска победа, додека во поразениот тим одлични беа Иванковиќ и Влах со седум, а еден помалку имаше Маргуч.
За разлика од Барселона, Нант без многу пот го одбрани домашниот терен со Елверум и славеше убедлива победа од 41:30. Одличен натпревар за францускиот тим постигна Мае со седум гола, а шест запиша Одриозола. За Елверум се истакна Авад со осум погодоци, три во првиот и пет во вториот дел.
Екипата на Кил ја забележа втората пообеда во новата сезона во ракометната Лига на шампиони, откако пред својата публика славеше со 34:29 над шампионот на Унгарија, ПИК Сегед. Екберг со шест и Раинкинг со пет гола беа најпрецизни во редовите на Кил, додека за ПИК Сегед најрасположен беше Роста со шест погодоци.
Значајни три бода запиша и екипата на Висла Плок, која што го искористи домашниот терен и му го нанесе првиот пораз на ГОГ Гудме (31:27). Кај победничкиот тим се истакнаа Лучин со седум и Житников со четири гола, а за данскиот тим прв стрелец беше Питлик со шест погодоци.