Рекордно високите цени на гасот создаваат притисок на многу европски компании, вклучително и неинтегрирани снабдувачи на енергија, производители на ѓубрива и компании за широка потрошувачка, објави денеска „Фич рејтинг“.
Помалите компании се под најголем притисок, додека поголемите компании со разновидно работење се во подобра позиција и полесно ќе го ублажат влијанието на зголемувањето на цената на гасот, посочува „Фич“.
Тие предупредуваат дека цените на бензинот може да останат високи до крајот на зимската грејна сезона, со оглед на ниското ниво на залихи во европските складишта.
Откако сезонски силната побарувачка ќе ослабне, цените на бензинот треба да паднат, предвидува агенцијата.
Поскапувањето на гасот особено ги погоди производителите на ѓубрива, кои го користат како суровина и исто така произведуваат јаглерод диоксид, важен за голем број други сектори, вклучително и производителите на храна.
Британија денеска објави дека очекува нагло зголемување на цените на СО2, а јапонскиот производител на индустриски гас „Нипон Гас“, кој е меѓу најголемите во светот, предупреди дека недостигот на тој гас се прелева од Британија и од остатокот на Европа, пренесува Фајненшл Тајмс.
„И другите земји во Европа ќе почувствуваат недостиг на јаглерод диоксид“, најави „Нипон Гас“, кој минатата година оствари продажба на индустриски гас во Европа во вредност од речиси 1,5 милијарди долари, додавајќи дека неговата понуда на Стариот континент е преполовена.
Претходно оваа недела, Британската асоцијација за преработка на месо предупреди дека некои компании ќе останат без јаглерод диоксид во рок од пет дена, принудувајќи ги да го прекинат производството, што ќе влијае на испораката на храна до продавниците.
