Филхармонијата ќе донира 130 илјади денари на Инфективната клиника

13

НУ Филхармонија се откажува од Договорот со Министерство за култура за меѓународно претставување на институцијата во 2020 година. Станува збор за износ од 2.300.000 денари кои беа наменети за меѓународно претставување на институцијата и презентација на македонската култура во светот. Воедно, институцијата ќе донира и 130 илјади денари од сопствен буџет на Универзитетската клиника за инфективни болести и фебрилни состојби во Скопје.

„Се откажуваме од овие средства кои во моментов може да се пренаменат за многу поважни работи со оглед на состојбата со која се соочува нашата земја. Нашата институција ќе донира и 130 илјади денари од сопствениот буџет на Инфективната клиника во Скопје“, вели Виктор Илиески, директор на Филхармонија во сооштението испратено до медиумите.

Филхармонија продолжува со емитување на концерти на својот Јутјуб канал и на социјалните мрежи.

„Во овие моменти најважно е да се почитуваат препораките и сите да седат дома. Токму затоа го инициравме виртуелното дружење со нашиот оркестар, со врвните солисти и диригенти кои настапија на нашата сцена. Сакаме во овие тешки моменти да им го збогатиме секојдневието на нашите сограѓани со врвна музичка изведба. Музиката има терапевтска моќ, тоа го докажале безброј истражувања досега. Ако не можеме да помогнеме директно, како што тоа го прават неуморно здравствените работници, на кои сме им неизмерно благодарни, можеме барем индиректно преку моќта на музиката да им помогнеме на луѓето полесно да се соочат со предизвиците. Можеби звучи утописточки и романтично, но ние сакаме да веруваме дека музиката може да го спаси светот“, истакнува Илиески.