Трето продолжение од серијалот за аферата „Рекет“ е објавено во дигиталното издание на италијанскиот весник „Ла верита“. Во објавените снимки повторно се слуша гласот кој наводно е на специјалната јавна обвинителка Катица Јанева.
Во едниот разговор помеѓу обвинетиот во предметот „Империја“ Орце Камчев и Бојан Јовановски-Боки 13, најверојатно на интерфон е вклучен трет соговорник. Орце Камчев му кажува на Боки 13 дека му треба пасошот за „да оди до Турција да заврши некоја работа’.
Женски глас, кој се слуша по интерфон вели: „Другото јас сè го држам под контрола“, на што Боки 13 одговара: „Не, он се плаши од Лиле“, на што Камчев возвраќа: „Не се плашам бе!“, по што женскиот глас додава: „Многу сум ангажирана затоа не ја држам така редовно под контрола, инаку без мене она не може ништо“.
Најверојатно станува збор за обвинителката Лиле Стефанова која го води случајот на СЈО „Империја“.
Потоа во друга снимка, Камчев му се јавува на Бојан 13 и се жали дека СЈО пуштило покани за 8 души, меѓу кои „братот на Ана“ (најверојатно братот на сопругата, н. з.), „Миро, МПМ“. Од другата страна на линијата Боки 13 е заедно со некое женско лице и ја прашува, а таа објаснува дека тие се сведоци, а не осомничени.
