Употребете некоја од последните тегли доматен сос од зимницата и уживајте во топла супа со вкус на здравје и спомени за летните денови. Таман доволно чили да ве разбуди од летаргијата и инертноста наметнати од изолацијата.
Потребно е:
- 2-3 лажици масло
- ½ главица ситно исечкан кромид
- Лист лорбер
- 500 мл варен домат
- 800 мл вода
- 1 лажиче сол
- 1 лажичe мелен зачински зеленчук
- 1 лажиче ситно сечкан рузмарин
- ½ лажиче мелен лут црвен пипер
- ½ лажиче кафеав шеќер
- 50 г ситни тестенини
Приготвување:
На загреано масло пропржете ситно исечкан кромид и лист лорбер, додека да омекне малку кромидот. Налејте го варениот доматен сос, додадете вода, покријте го тенџерето и почекајте чорбата да проврие.
Во провриената чорба додадете ги сите останати зачини, па промешајте.
Додадете ги тестенините и варете десетина минути или додека да омекнат, ама внимавајте да останат „ал денте“.
Сервирајте ја чорбата топла.
