Со посета на домовите на жителите на село Ѕвегор, вчера во раните утрински часови започна василичарскиот обичај Ѕвегорска Сурова, традиција стара над 100 години, која завршува со откривањето на невестата која е главна маска на карневалот.
Суроваскарите меѓу останатите куќи ја посетија и куќата на овогодишниот кум, кој е задолжен за организацијата на заедничката веселба, која заедно со традиционалната суроваскарска вечера се организира во селскиот дом. За кумот Ѓорѓи Манов најважно е што и годинава обичајот продолжи во духот на она што од секогаш било карактеристично за Ѕвегорска Сурова.
– На 14 јануари е Василица или Сурова на наш дијалект кажано. Правиме голем фестивал или да го наречам обичај кој започнал пред 100 години и трае и ден-денешен. Задоволен сум таа година од маскираните учесници во Ѕвегорската Сурова – истакна Манов.
Старосватот во годинешниот обичај, Живко Цонев, раскажува дека за време на Сурова се криеле од полицијата, бидејќи ги гонеле по селото за да не се одржува. Инаку традицијата е од одамна, од турско, порано ноќе не смеело да се оди на Сурова, не давале Турците и затоа веќе години наназад Сурова се одржува преку ден. Јас порано одев, но остарев и тоа им го препуштив на помладите – рече Цонев.
Белаците се една од позначајните 40 маски на Ѕвегорска Сурова покрај невестата. – Имаме маски Белаци, Цигани, Мечка, Мечкар. Моја задача како Велак е да ја бранам невестата да не ја откријат, зошто ако ја откријат Сурова не е успешна – истакна учесник во карневалот.
Ѕвегорци го бркаат злото од селото кое е едно од верувањата поврзано со овој обичај се до моментот на откривањето на невестата, по што продолжи заедничката веселба помеѓу учесниците во василичарскиот обичај.