Здрав, посен и топол оброк. Оваа ароматична, хранлива, освежителна и здрава чорба, која воедно и лесно се подготвува може да ја јадете секој ден.
Тиквата има потврдени лековити својства и идеална е во борба против срцеви заболувања, ризикот од карцином и мозочен удар. Изобилува со хранливи материи, а нејзиниот состав го сочинуваат високо ниво на антиоксиданси и каротен, и особено високо ниво на витамин Ц и Е.
Зелената млада тиквичка пак, исто така содржи многу витамини и минерали и нејзината консумација има позитивно влијание врз срцето и крвните садови, покачениот холестерол и триглицериди во крвта, како и кај лицата со дијабетес.
Комбинацијата од зеленчуци со богат состав на благотворни материи ја прави оваа чорба „кралица“ на есенската трпеза.
Потребни состојки:
- 300 грама тиква
- 3 моркови
- 1 помала тиквичка
- 1 компир
- 1 главица кромид
- 3 чешниња лук
- сол, бибер, куркума
- две коцки за супа (зеленчуков бујон)
- магдонос
- маслиново масло
Подготовка:
Исецкајте го кромидот и лукчето и ставете ги да се пржат на путер во поголемо тенџере (во кое ќе ја варите чорбата), додека малку не заруменат. Тиквата, тиквичката, компирот и морковот нарендајте ги на крупната страна на рендето и откако кромидот ќе добие златно-жолта боја, додадете ги во тенџерето да се издинстаат. Посолете ги, ставете малку бибер и динстајте ги неколку минути.
Откако зеленчукот ќе се издинста, во тенџерето додадете 1,5 литар зовриена вода, во која претходно сте ги додале двете коцки за супа.
Оставете чорбата да врие 5 минути, а кога ќе биде готова додадете ситно сецкан магдонос и половина лажичка куркума.
Доколку сакате да ја „омрсите“ чорбата може да ја сервирате со топчиња павлака. Уживајте во вкусот!
