Полскиот шампион Киелце следната недела треба да го претстави новиот спонзор, кој ќе има задача да ја подобри финансиската ситуација во клубот, но и да успее да ги задржи поголемиот број на играчи, кои се веќе пикирани од богатите европски клубови, пренесуваат полските медиуми.
Како што е веќе познато, екипата на Киелце влезе во финансиска криза откако главниот спонзор пиварницата „Ломза“ реши да се повлече од клубот, па така сѐ уште не е познато во кој правец ќе се движи поранешниот европски шампион.
Сепак, како што соопштува радио ,,Киелце”, челниците на полскиот шампион најверојатно успеале да најдат спонзор. Новиот спасител на клубот би требало да биде претставен на 2 март, односно на дуелот меѓу избраниците на Талант Душебаев и Барселона во рамки од последното коло од групната фаза во Лигата на шампионите.
Претходно, Општината Киелце веќе го одби клубот за помош, но претседателот Бартош Сервас не се откажува од борбата за нов генерален спонзор. Киелце од трансферот на Ремили во Веспрем, на свое конто заработи 1.000.000 евра.
