Не постои возрасен човек на светот кој не сака да има домашна храна на трпезата. Македонија е извонредно богата со здрави зеленчук и овошје, но дали се користи сето тоа богатство од продукти, односно дали се приготвуваат правилно. Важно е да се знаат различните методи за готвење, зашто сè си има свои карактеристики, предности и недостатоци кога станува збор за вкусот и за хранливата вредност. Сите форми на готвење носат хемиски промени зашто при готвењето, се губат витамини, но и водата и минералните соли.

Има многу начини да се зготви сочна и вкусна храна без додавање тони непотребни додатоци. Сите знаат дека прженото е штетно, но дали знаете дека топлината може да разложи и уништи 15-20 отсто од некои витамини во зеленчукот – особено витаминот Ц и калиумот. Некои продукти може да се јадат свежи, но некои се тешки за варење. Во морковите, спанаќот и во доматите, на пример, топлината го олеснува ослободувањето на антиоксиданси со распаѓање на клеточните sидови, обезбедувајќи полесен премин на здравите компоненти од храната во телото. Тестенините и оризот губат 2/3 од протеините, јаглеродните хидрати, витамините и минералите. Што се однесува до витамините, во некои видови зеленчук како брокулата, при готвењето може да се активираат витамини што биле во мирување.

Варењето е брзо, лесно и сè што треба да додадете е вода и прстофат  сол. Но, високите температури и многу вода може да ги растворат витамините растворливи во вода и 60-70 проценти од минералите во некои видови храна, особено во одреден зеленчук. Обарувањето е најдобриот начин да се зачуваат хранливите материи во морковите, тиквичките и во брокулата (кога ќе се споредат со пржење или кога се сурови).

Готвењето на пареа на свеж зеленчук, па и на филети од риба, овозможува тие да се готват во сопствените сокови и да ги задржат своите корисни состојки. И нема потреба од додатоци. Секогаш е добро прво да додадете малку зачини, без разлика дали тоа е сол или цеден сок од лимон.

Печењето е техника на продолжено готвење на храната со сува топлина, дејствувајќи со спроводливост, а не со зрачење, нормално во рерна. Првенствено се користи за подготовка на леб, месо, риба, здрави колачи. Исто така, се користи за подготовка на компир, јаболка, грав, некои јадења со тестенини како лазањи и разни други намирници. Овој метод, секако, носи придобивки при готвењето и се вбројува во здраво готвење.

 

 

 

 

 

 

 

 

 

 

 

 

Скарата е одлична опција. Потребни се минимални маснотии, кои даваат чаден вкус. Ваквиот начин ги чува месото и зеленчукот сочни. Редовното консумирање јагленосано, добро изработено месо може да го зголеми ризикот од карцином на панкреасот и од рак на дојка. Готвењето на висока температура, исто така, може да произведе хемиска реакција меѓу маснотиите и протеините во месото, создавајќи токсини. Ова не значи дека се забранува скарата – само држете се до посни парчиња месо за кои е потребно помалку време за готвење.

Ако се изведе правилно, пржењето не треба да ја направи храната претерано мрсна бидејќи влагата во храната го одбива маслото. Длабокото пржење содржи трансмасти, кои се опасни за вашето здравје. Избегнувајте да пржите.

Суровата храна е актуелна и има добра причина за тоа. Многу студии сугерираат дека има придобивки од внесување повеќе сурова храна во исхраната. Од мое искуство знам дека хранењето по принципот на виножито го намалува ризикот од рак и од други болести.

Марија Соколоска