Легендарниот Раде Шербеџија и овој пат во Скопје пред својата верна публика, која до последно место ја исполни Македонската филхармонија, направи концерт за паметење (во организација на “Авалон“). И сè во неговиот стил. Дури и по прашањето на имиџот со неизбежната шапка како моден детаљ. Ќе кажете можеби, веќе видено, но не е така. И да е, ете на пример видено, кога Раде тоа го работи, делува постојано свежо, интересно, релаксирано. Особено ако ги прераскажува своите настани со познатиот кантавтор Арсен Дедиќ додека тој беше жив, а со кој Раде многу соработувал.
–
Тие приказни предизвикаа смеа во публиката, бидејќи фановите на Раде го сакаат и кога раскажува и кога рецитира поезија, но и најмногу кога пее.
А, богами пееше Раде, пееше цели два часа… и како вистински боем на кој сè му е простено особено додека на самата сцена пиеше од доброто македонско вино кое, како што вели, такво вино оди само со песна…
–
А, песната лесна, приемчива за уво, за душа. Малку стари, малку нови, комбинирано, а сè испратено со долги аплаузи од публиката која со голема причина дома си замина задоволна, велејќи на излегување, дека пак ќе дојдат на неговиот концерт. Раде е еден, и од кал да е, никој не може со него така боемски, не можат дури ни оние силни холивудски ѕвезди со кои тој или настапува на сцената или само другарува. фото-текст: Дуле М.