Откако севернокорејскиот лидер Ким Џонг Ун прогласи победа во борбата на неговата земја против коронавирусот, неговата сестра Ким Јо Џонг откри дека тој исто така страдал од вирусот и вети „смртоносна одмазда“ против Јужна Кореја, која ја обвини за предизвикување на епидемијата.
Ким нареди укинување на строгите епидемиолошки мерки воведени во мај, истакнувајќи дека Северна Кореја мора да одржи „силна челична антиепидемиска бариера и да ја интензивира работата за запирање на инфекциите до крајот на глобалната здравствена криза“, се вели во извештајот на државната новинска агенцијата KCNA, пренесува Ројтерс.
Ким ја даде изјавата вчера за време на говорот за понатамошната Ковид политика пред илјадници службеници кои седеа без маски во затворен простор, според снимките од државната телевизија.
На толпата им се обрати и неговата сестра Ким Јо Џонг и рече дека самиот млад лидер имал симптоми на треска, што за прв пат укажува дека можеби бил заразен со вирусот, објави КЦНА.
„Иако беше тешко болен, со висока температура, не можеше да легне ниту за миг, размислувајќи за луѓето за кои мораше да се грижи, до крајот на војната против епидемијата“, рече Ким Јо Јонг.
Таа не елаборираше за здравјето на севернокорејскиот лидер, но ги обвини пропагандните летоци од Јужна Кореја пронајдени во близина на границата за предизвикување на епидемијата на коронавирус во нејзината земја.
Јужнокорејското Министерство за обединување, кое се занимава со односите со Пјонгјанг, изрази жалење поради повторените „неосновани тврдења“ на Северна Кореја за потеклото на нејзината епидемија на Ковид-19 и „грубите и заканувачки забелешки“ кои доаѓаат од земјата, наведува британската агенција.
