Сензорна соба ќе се отвори во градинката „11Октомври“ во Радишани

102

Во Градинката „11 Октомври“, во населбата Радишани, ќе се отвори сензорна соба во која ќе се третираат деца со развојни нарушувања и аутизам. Со нив ќе работи стручен тим составен од дефектолог, педагог, психолог, логопед и воспитувачи.

Овој проект ќе го реализира Град Скопје во соработка со Општина Бутел.

– Целта на отворање сензорна соба е да се одговори на потребите на децата со развојни нарушувања и аутизам, како и  да се подобри квалитетот на живот на децата и нивните семејства. Раниот и предучилишен период е клучен за развој на сензорната интеграција – соопштија од Градот.

Сензорната соба ќе биде со површина од над 60 квадратни метри, со адаптиран тоалет за лица со попречености и одвоен влез од влезот што  вообичаено се користи. Услугите во сензорната соба ќе може да ги користат децата од територија на општина Бутел. Работата со децата  се изведува преку индивидуален пристап, а дневно ќе може да се опфатат 10 до 12 дечиња. Во собата за сензорна интеграција се предвидува и примена на музикотерапија.

Собата ќе се опреми со меки подови и ѕидови, интерактивна туба со вода, топчиња и меурчиња кои плутаат, ротирачка диско-топка, сноп од светлечки оптички влакна, рефлектор, огледални фолии кои го зголемуваат  ефектот на целата преостаната опрема, аеросол-ароми за аромотерапија, вибрациона музичка фотелја, подлога во вид на перница, UV-ламба, кружен балансер со масажер и други елементи што треба да ги задоволуваат светските норми и стандарди за квалитет.

Град Скопје за оваа намена издвои буџет во висина од 700.000 денари за опремување на сензорната соба.