САД достигнаа уште една мрачна пресвртница во борбата против катастрофалната пандемија со Ковид-19: еден од 500 Американци почина од коронавирус од првата пријавена инфекција во нацијата.
До вчера вечерта, 663.913 луѓе во САД починале од Ковид-19, според податоците на Универзитетот Џонс Хопкинс. Според Бирото за попис на САД, американското население заклучно со април 2020 година изнесувало 331,4 милиони.
Здравствените власти во САД известуваат за повеќе од 30 отсто зголемување на просечните дневни случаи и речиси тројно зголемување на просечните дневни смртни случаи во текот на минатиот месец, според податоците на американскиот Центар за контрола и превенција на болести.
Но, со само 54 отсто од населението кое е целосно вакцинирано, стапката на луѓе што иницираат вакцинација секој ден се намали во текот на изминатиот месец.
Здравствените експерти ги поздравија вакцинациите како најдобар извор на заштита од вирусот, истакнувајќи дека повеќето луѓе хоспитализирани и кои го загубиле животот поради компликации од Ковид-19 се невакцинирани. Во Пенсилванија, од 1 јануари до 7 септември, 97 отсто од смртните случаи поради Ковид-19 во државата беа меѓу невакцинирани луѓе, изјави вчера вршителот на должност секретар за здравство во Пенсилванија.
Друг вид на силна заштита, велат експертите, е носење заштитни маски.
ЦДЦ им препорачува на луѓето – дури и оние кои се целосно вакцинирани – да носат маски во затворени простории во области со значителен или висок пренос на вирусот.
